E fabor mas grandi cu nos por ricibi di Dios ta bida eterna, pasobra pa gracia nos ta salba ( Efesionan 2:8-9).
Fabor di Dios, di Dios no ta algo cu ningun hende por kita for di bo, pasobra locual Dios bisa ta pa bo, ta pa bo e ta.
Noe a ricibi gracia y fabor di Dios y a construi e Arca, riba palabra y obedencia na Dios.
Awendia nos tambe por ricibi fabor di Dios, ora nos pone nos fe den Cristo Hesus, y confia den e palabra di Dios cu ta restaura bida di hende.
Dios mes ta haci nos limpi di nos pasado y ta duna nos un futuro briyante den Cristo Hesus.( 2 Corintionan 5:17).
Locual Dios ta haci pa nos, ningun hende no por haci pa nos,pasobra hende ta priminti y lubida, Dios semper tey cu nos, Dios nunca lo bandona nos.
Pasobra wowo di Senjor ta move bay bin door di henter tera,pa e por sostene fuertemente esnan cu nan curason ta completamente di dj’E. ( 2 Corintionan 16;9).
Y nos sa cu Dios ta haci tur cos obra hunto pa bon, pa esnan cu ta stima Dios,pa esnan cu ta yama segun su proposito,( Romanonan 8;28).
Den Isaias 37 nos por mira con Rey Ezequias a ricibi fabor di Dios, cu a salba su bida y henter un pais.
Den e buki di Esther nos por mira con Esther ta ricibi fabor di Dios y henter un pueblo ta wordo salba.
Ora nos ta busca cara di Dios , di henter nos curason, nos ta ricibi fabor di Dios, pasobra Dios ta bendiciona esnan cu ta dune prome lugar den nan bida.
Awendi pa falta di temor di Dios, hende ta keda sin ricibi fabor di Dios, pasobra Dios ta buscando bida limpi, puro, y dedica caminda e por derama su gracia y su fabor,
Pesey e palabra di Dios ta bisa nos: Ma busca prome e reino di Dios y su husticia y tur e cosnan aki lo wordo anadi na boso.( Mateo 6:33).
Ta nos fieldad na Dios ta demostra tur cos, pasobra ora nos no ta fiel na Dios, nos no tin stabilidad spiritual, nos ta tambalea y e enemigo ta stroba nos crecemento.
Hesus tabata crece den sabiduria y estatura,y den gracia serca Dios y hende.
Ta cu gracia Dios ta habri porta pa nos den bista di hende, porta cu ningun hende por sera, pasobra esey ta keda demostra door di Dios mes ora su man ta riba nos bida.
E wowonan di Senjor ta riba e hustonan y Su horea ta atento pa scucha nan sclamacion.( Salmo 34:15).
Pasobra Abo Senjor ta bendiciona e hende husto, manera cu un escudo bo ta rondone cu fabor.( Salmo 5:12).
Pa medio di fabor di Dios, nos ta alcansa metanan grandi den nos bida, cual ni placa, tampoco estudio por compara cune.
Pasobra tur sabiduria puro y santo cu ta bini di cielo ta pa motibo di favor di Dios.
Tur don y talento, ta un expresion di gracia y fabor di Dios den nos bida, pasobra tur cos bon ta bini di ariba for di nos Tata todopoderoso cu ta den cielo.
E bendicion y favor di Dios, ta alcansa nos bida, ora nos bida ta dedica na Dios, apartando nos mes di tur orguyo y falsedad, di tur arogancia, y tur inhusticia y malicia.
Ta dificil pa pone binja nobo den saco bieu, ta dificil hanja cosnan nobo, sin busca prome locual ta nobo den Cristo Hesus.
Busca fabor di Dios.
Sinceramente Pastor Marcel Balootje
