Y awor ora cu nan a mira e confiansa,di Pedro y Juan y a compronde cu nan no tabata homber educa ni siña, nan a keda straña y a reconoce nan cu nan ta hende cu tabata cana cu Hesus.( Hechonan 4:13).
Aki nan nos por mira e bunitesa di dedicacion, na Dios.
Kico ta nifica ora nos bisa un persona ta dedica na Dios? Esey ta nifica cu e persona ey ta comprometi cu Dios, su lealtad na Dios ta di un nivel extraordinario ( Daniel 6), e ta sirbi Dios constantemente,su seriedad cu Señor ta wordo identifica den su bida,door di e frutanan, cu ta sali pa dilanti, y ta demostra cu e persona ta dedica na Señor.
Ta door di dedicacion na Dios, nos por participa den Su naturalesa divino, ta nos dedicacion na Dios ta e motor di nos crecemento spiritual, sin dedicacion no tin crecemento.
Pesey Salmo 91:1 ta bisa nos lo siguiente:Esun cu ta biba bao di e proteccion di e Haltisimo,lo permanece den e sombra di e Todopoderoso.
Nos dedicacion ta hiba nos na conocemento di Dios su palabra y Su poder.
Pasobra si nos wak bon den bida di Hesus nos ta nota con dedica e tabata na Su Tata.
! Despues cu e a manda e multitudnan bay , E so a subi bay riba sero pa haci oracion ( Mateo 14:23).
! Despues di a despedi di nan, E a bay na e sero pa haci oracion.( Marco 6:46).
! Y a sosode den e dianan ey cu E a subi bay riba sero pa haci oracion, y E a pasa henter anochi den oracion na Dios.( Lucas 6:12).
! Mainta tempran ora tabata scur ainda, E a lanta y sali pafo, y a bay na un lugar solitario,y tabata haci oracion eynan.( Marco 1:35)>
! Pesey, Hesus a contesta y a bisa nan : Di berdad , di berdad Mi ta bisa boso, e Yiu no por haci nada di Su mes, si no ta algo cu E ta mira e Tata haci, pasobra tur loke e Tata haci e Yiu tambe ta haci mescos.( Juan 5:19).
! Pasobra no ta cu Mi mes autoridad Mi a papia, ma e Tata cu a mandami Mi a duna Mi mandamento, kico pa bisa y kico pa papia.( Juan 12:49).
Nos a wordo crea door di Dios y pa Dios. E potencial mas grandi di hende ta wordo demostra den su unidad y comprometi cu Dios, Pesey hende mester ta dedica cu Dios.
Den nos dedicacion na Dios, nos humildad , ta sali pa dilanti, hunto cu nos obediencia,pasobra ta imposibel ofrece un dedicacion falso na Dios, pasobra dedicacion ta bini for di curason y Dios conoce e curason cu ta dedica.
Bo dedicacion no ta depende di bo conocemento intelectual, cuanto conocemento biblico bo tin, pero e ta depende di bo compromiso, cu Dios, con bo ta biba y con bo ta sirbi Dios.
Ta nos deber di corda e boluntad di Dios pa nos bida; Pasobra esaki ta e boluntad di Dios boso, santificacion, esta pa boso abstene boso di inmoralidad sexual, pa cada un di boso sabi di tene su mes curpa,den santificacion y honor.No cu pasion y deseonan carnal,manera e pagano nan cu no conoce Dios.( 1 Thesalonisensenan 4:3-5).
Y no sea conforme e mundo aki,ma sea transforma, pa medio di e renobamento di boso mente,pa boso por comproba kico ta e bon, y agradabel y perfecto boluntad di Dios.( Romanonan 12:2).
Nos dedicacion na Dios ta importante pa nos bida y nos famia.
Sinceramente Pastor Marcel Balootje
