Hipopotamonan no ta mamiferonan cu di naturalesa ta biba na Sur-America. Pero e Narco traficante/ Terorista y fundado di cartel de Medellin, Pablo Emilio Escobar Gaviria den su tempo a busca algun hipopotamo for di Africa, pa su zoologico priva.
Na 1993 despues cu Pablo Escobar a wordo mata pa polis y su organisacion criminal a wordo desmantela. E hipopotamonan a logra huy for di e zoologico y a bay biba liber den naturalesa. Desde e tempo ey e animalnan aki a sigui reproduci y actualmente tin como 90 hipopotamo na Colombia.
Autoridad Colombiano tin basta tempo ta kibrando cabes kiko pa haci cu e animalnan aki. Nan no kier tiranan mata pa motibo cu e animalnan ta hopi keri pa hopi Colombiano.
Awo nan a yega na un solucion, sperando cu esaki lo yuda stop e reproducion di e hipopotamonan. Nan lo yena flechanan cu anticonceptivo y lo tira e hipopotamonan cu esaki, sperando cu asina nan lo stop e reproduci. Colombia kier interveni awo y no warda te ora cu e bestianan sigui reproduci y ta laat, cu tin miles y miles di hipopotamo ta cana rond.
Hipopotamo no ta un animal di Colombia, e ta di origen Africano. E hipopotamonan cu tin ta cana rond den naturalesa na Colombia, ya caba ta formando un menasa pa Colombia su teritorionan unda tin hopi awa, aki ta caminda cu tin cultivo y plantacionnan. E animalnan ta come y ta destrui cosechanan y plantacionnan.
