E region di Caribe ta conoci pa su cultura vibrante, paisahenan bunita, y ecosistema diversifica. Pero, hopi di e islanan chikito den e region aki ta enfrenta desafíonan grandi relaciona cu siguridad di cuminda. Sin suficiente agricultor, nos ta dependende demasiado di importacion di cuminda, y nos ta mas vulnerabel pa e cambio climatico y e cadena di transporte. Mi persona ta di opinion cu ta hopi importante pa nos isla cuminsa enfoca mas riba produccion di su propio cuminida pa asina por ta mas resiliente y sostenibel. Aruba ta un ehempel cla di e desafío y e oportunidad aki, specialmente pa loke ta trata e sector turístico y e compromiso pa cu nos medio ambiente.
Beneficio economico y siguridad di cuminda
Aruba, un isla chikito cu un area di solamente 180 km², ta depende hopi di importacion di cuminda -rond di 80 pa 85% di e necesidadnan di cuminda ta importa – principalmente for di Estados Unidos, Venezuela, Colombia, y otro islanan den Caribe. E gasto di Aruba pa importa cuminda ta aproximadamente 200 miyon USD cu ta pone nos isla na riesgo di fluctuacion di mercado mundial y problema den cadena di suministro. Durante e pandemia di COVID-19 e vulnerabilidad aki a keda mas bisto, y a yuda pa enfatisa e necesidad pa aumenta e produccion local di cuminda. Door di stimula e produccion di berdura y otro cultivo, por reduci e dependencia di importacion y crea empleo. Por ehempel, si Aruba por aumenta e produccion di berdura y otro cultivo local cu solamente un 15 te 20%, esey por spaar nos nos isla e fluho di capital cu ta sali pa importa e tipo di cuminda aki.
Sostenibilidad di e medio ambiente
Si tuma na cuenta cu Aruba ta un isla seco cu un clima di desierto y cu recurso di awa limita, esey ta haci dificil pa e isla por expande e agricultura tradicional. Pero metodonan innovativo manera hydroponics, agricultura vertical, y aquaponics ta trece solucion. E metodonan aki por aumenta e produccion local di cuminda cu un 30%, mientras ta conserva awa y energia. Ademas, e ta promove un Aruba sostenibel cu ta implementa e tipo di tecnologia sostenibel cu ta beneficia nos medio ambiente, especialmente si combin’e cu energia renovabel y concepto pa conserva awa. Asina ey nos por pone nos isla riba e mapa mundial den “AGRI TOURISM”. E compromiso di Aruba pa cu nos medio ambiente ta refleha den e politica di sostenibilidad cu ta promove energia renobabel y conservacion di awa.
Resistencia contra e cambio climatico
E cambio climatico ta representa un menasa grandi pa Aruba, cu e aumento di nivel di laman, secura y tormentanan fuerte cu cada aña ta yega mas cerca y ta mas frecuente. E recurso di awa di nos isla ta depende di desalinisacion, cu ta un proceso cu ta uza hopi energia. Mi ta di opinion cu nos mester focus riba “Water Harvesting” y asina lo por coba pos den cada bario pa asina pueblo por tin acceso na awa dushi pa usa den nan hofi na cas. Tambe nos mester promove e produccion di cuminda cu ta resistente na secura, manera yuca, batata dushi, y yerba indigeno cu ta permiti produccion di cuminda den tempo di secura.
Turismo y herencia cultural
E turismo ta un sector fundamental pa Aruba, cu ta contribui na mas cu 80% di e PIB. Un turista ta busca un experencia autentico di Aruba, caminda cuminda local ta importante. Iniciativanan manera e movimiento “Farm-to-Table Aruba” ta promove e uzo di e cultura local di cuminda, manera Yambo, Concomber, Pampuna y Yerbanan di e isla, pa sirbi na hotel y restorantnan. Esaki ta fortalece e identidad di Aruba y e turismo sostenibel. Tambe e mercado di cuminda local, manera e “Aruba Farmers Market” ta atrae turista cu ta interesa den e sabornan autentico di Aruba. E esfuerso aki ta reforsa e reputacion di Aruba como un destino cu ta promove sostenibilidad y cultura.
Conclusion
No solamente mester stimula e cunukeronan pa cuminsa cultiva mas frecuente y no solamente den temporada di awasero. Tambe mester stimula cada ciudadano pa cuminsa produci cuminda den su propio cura. Den un skina den bo cura bo por traha un haula cu 4 galiña y asina ya caba bo ta spaar placa y alabes bo tin un fluho di compost infinito cu lo yuda bo den bo hofi. Menos cuminda cu wordo importa, mas divisas ta keda Aruba cu por wordo uza pa inverti mas ainda den nos mes. Otro beneficio lo ta cu e adulto mayor ta move mas, come mas saludabel y tur esey por yuda baha e gastonan di AZV.
Mi persona y partido PPA ta comprometi pa yuda pueblo bira mas resiliente y independiente, sigur tumando nota di acontecimentonan geo-politico cu ta andando rond mundo!
Bo sirbidor Rigoberto Sint Jago PPA
