Dios a establece famia.
Famia ta e pilar di sociedad.
Matrimonio y Famia ta un instituto social.
Famia ta fundeshi di formacion moral y spiritual.
Famia uni ta trece stabilidad y bienestar den comunidad.
Amigonan di Famia:
Amor, Pordon, Obediencia, Respet y Confiansa.
Enemigonan di Famia:
Conflicto y falta di Respet.
Orguyo.
Arogancia.
Falta di pordon,
Adulterio.
Tur sorto di Adiccion.
Golosidad pa placa,
Inmoralidad.
Idolatria.
Desobedencia na Palabra di Dios.
Mal Comportacion.
Tur clase di Abuso.
Influencia negativo ( bruheria, santeria, satanismo).
Manipulacion y Murmuracion.
Falta di reconoce Dios.
No tin nada mas precioso y bunita cu un famia uni, pasobra cada un ta ricibi forsa y positivismo di otro, y asina ta cunpli cu e palabra di Dios ( Salmo 133).
Y nan por ta uni den oracion segun Mateo 18:19-20 y asina mira e poder di Dios wordo manifesta den nan bida.
Ora un famia uni pa haci bon, bondad lo goberna nan bida, pero ora un famia uni pa haci malo , maldad lo goberna nan bida.
Hopi biaha locual e antepasadonan sembra ta keda den e generacion, te ora Cristo Hesus drenta den e famia, y e maldicion wordo kibra.
Pesey ta masha inportante pa un famia tin Cristo Hesus como prioridad, den tur cos , E ta garantia di Salbacion y bida eterna, e garantia di pas y trankilidad.
E enemigo ta haci tur locual ta posibel pa trece division den famia, pasobra famia a wordo institui door di Dios, y famia ta representa Dios, ora nan ta uni, pasobra Dios a bisa laga Nos crea hende segun Nos imagen y semehansa, y nos ta nifica Union.
Pesey e union den famia, ta algo di gran balor, pasobra caminda tin union eynan Dios ta derama su bendicion, eynan su presencia ta staciona, y ora nan uni den oracion,Dios ta haci cosnan grandi.
Pasobra boso tur ta yuinan di Dios, door di fe den Cristo Hesus. Pasobra boso tur cu a wordo batisa den Cristo , a bisti boso mes cu Cristo. ( Galationan 3:26-27).
Cu tur humildad y suavidad,cu pasenshi,soportando,un y otro den amor, siendo diligente pa preserva e unidad di e Spirito den e vinculo di pas.( Efesionan 4:2-3).
No laga ningun palabra danino sali for di boso boca,sino solamente palabra cu ta bon pa edificacion, conforme e necesidad di e momento,pa esaki por duna gracia na esnan cu ta tende.( Efesionan 4:29).
Tur cos cu ta duna e enemigo chens di manifesta den nos bida, y habri porta pa maldad mester wordo poni un banda.
Pesey e palabra di Dios ta bisa; Laga tur amargura, furia,griteria,rabia,y calumnia wordo kita for di boso, hunto cu tur malisia. Y sea carinoso un cu otro, misericordioso, pordonando otro, mescos cu Dios den Cristo tambe a pordona boso.( Efesionan 4 :31-32).
Cada divorcio ta un sla pa nos sociedad, cada biaha cu un pareha mester separa for di otro,ta un sla duro pa e yuinan, pasobra di tur manera yiu ta sinti falta di nan mayor, tene cuenta cu ausencia di hende no por wordo yena cu material, cu e amor original di un mama y un tata no por wordo copia.
Pesey ta algo duro pa un mucha ora su mayornan ta ganja otro, y nan ta separa, kibrando e mucha su speransa di lanta den un cas uni.
Hopi biaha hende grandi, no por imagina nan mes cuanto danjo nan paranda , bagamunderia, inmoralidad ta haci na nan yuinan, nan no sa e dolor di e muchanan.
Famia ta y ta keda e pilar di Sociedad, y e mester wordo balora.
Sinceramente,Pastor Marcel Balootje
