Preocupacion principal di consumidor den e tercer trimester di 2025 pa e siguiente 6 lunanan:
- Como di 30% di e respondentenan ta premira cu e situacion financiero di nan hogar lo deteriora (2025-II: 17%).
- Deterioracion den e situation di negoshinan y di e economia a subi na 56% (2025-II: 46%).
- Como 42% di e respondentenan ta premira cu lo ta mas dificil pa haya un trabou nobo (2025-II: 40%).
- E mesun porcentahe di respondentenan (39%) ta premira cu e posicion financiero di gobierno lo empeora (2025-II: 39%).
Banco Central di Aruba (BCA) a conclui e Encuesta di Confiansa di Consumidor pa e tercer trimester di 2025. E encuesta di confiansa di consumidor ta evalua e percepcion economico di e consumidor local.
Consumidornan a keda pesimista, mirando cu e Indice di Confiansa di Consumidor a baha na 92,8 den e tercer trimester di 2025 (mira Grafico 1)1.
Grafico 1: Indice di Confiansa di Consumidor a baha den e tercer trimester di 2025.
92,8
Fuente: Banco Central di Aruba
E Indice di Habito di Consumidor a baha cu 3,3 punto di indice te na 93,5 durante e tercer trimester di 2025. E Indice di Situacion Actual y e Indice di Expectativa a baha den e di tercer trimester di 2025 cu 1,9 punto di indice te na 92,4 y 1,6 punto di indice te na 93,1, respectivamente. Mientrastanto, e Indice di Expectativa di Prijs a keda igual na 90,2 durante e tercer trimester di 2025 (mira Grafico 2).
Grafico 2: Resultado di Indice di Confiansa di Consumidor den e tercer trimester di 2025.
Fuente: Banco Central di Aruba
Prijsnan mas halto den e proximo 6 lunanan ainda ta keda un preocupacion grandi pa e respondentenan, como cu 90% di consumidornan ta premira cu den e siguiente 6 lunanan prijsnan lo ta mas halto, cual ta un punto di porcentahe menos compara cu e segundo trimester di 2025. Respondentenan cu a indica cu nan por “cumpra menos cu nan entrada compara cu 6 luna pasa” a subi cu 4 punto di porcentahe te na 92% den e tercer trimester di 2025. Pa locual ta e respondentenan cu a expresa cu nan ta spaar menos, esaki a crece cu 11 punto di porcentahe te na 46% den e tercer trimester di 2025.
E relato completo di e Encuesta di Confiansa di Consumidor ta disponibel ariba website di BCA www.cbaruba.org
1 E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu consumidornan no ta ni optimista, tampoco pesimista, pero ta neutral den nan pensamento di desaroyo economico na Aruba. Entre 100 y 110, e indice ta mustra un situacion di optimismo den pensamento di consumidornan
