Dialuna 14 di april, Prome Minister di Aruba mr. Mike Eman a duna un cordial bonbini na Minister di Asuntonan di Exterior di Surinam Albert Ramchand Ramdin na e edificio di gobernacion pa un reunion oficial cu ta enfatisa e relacion fuerte y duradero entre Aruba y Surinam. Durante e reunion, Sr. Ramdin a felicita Prome Minister Eman cu formacion di e gabinete nobo y a expresa su deseo pa sigui fortalece e relacionnan bilateral. Sr. Ramdin lo asumi su cargo nobo oficialmente como Secretario General di e Organisacion di Estadonan Americano (OEA) dia 26 di mei, un rol clave den desaroyo hemisferico.
Oportunidad comercial y cooperacion regional
E bishita di e mision comercial na Surinam cu a tuma luga algun luna pasa, y e bishita di Presidente di Surinam, Sr. Chan Santokhi, na Aruba na october di aña pasa, durante cual a firma un Memorandum of Understanding (MoU), ta reforsa e oportunidadnan comercial entre e dos paisnan ruman. E MoU aki ta habri caminda pa diferente oportunidad comercial y ta reforsa e cooperacion regional.
Durante e reunion, a discuti riba e contenido di e MoU, y tambe riba e preocupacion actual relaciona cu e situacion geopolitico mundial, cu ta crea tension pa e importadonan Arubano cu ta busca alternativanan pa suministracion di producto di consumo. A pesar di e desafionan den transporte maritimo, particularmente pa container entre Surinam y Aruba, e mision comercial di aña pasa a demostra cu tin hopi potencial cu por explora.
Un laso historico y familiar cu ta uni nos pueblo
Prome Minister Eman a gradici Minister Ramdin pa su bishita oportuno, reconociendo cu den un mundo di incertidumbre global, un bishita manera esaki ta demonstra e importancia cu Surinam ta duna e relacion cu Aruba. Eman a destaca e laso historico entre Aruba y Surinam, indicando cu hopi Arubiano tin rais familiar na Surinam y vice versa.
“Ta un honor pa nos pa por ricibi bo aki. E relacion entre Aruba y Surinam ta bay bek hopi aña, nos a comparti tempo hunto den Reino Hulandes, y awe den nos comunidad nos por mira hende naci na Surinam cu ta biba na Aruba, y tambe Arubiano cu ta biba na Surinam. E lasonan ta profundo, historico, y nos tin responsabilidad pa sigui traha riba esaki,” segun Prome Minister Eman.
Na final di e encuentro, Prome Minister Mike Eman a obsekia Minister Ramdin un cuadra di un casita Arubano cu ta simbolisa e pensamento di sostenebilidad cu ta biba na Aruba desde hopi decada. Na su turno, Minister Ramdin a presenta un obsekio simbolico di gran balor cultural di su pais na Prome Minister Eman, como muestra di respet y aprecio pa e relacion estrecho entre e dos paisnan.
