Diamars mainta rond di 9’or polis y ambulance a wordo manda cu urgencia pazuid di ex House Of Cheng ariba e caminda, unda cu coriente a dal un persona.
Na yegada di polis, nan ta topa un famia ta dunando CPR, aki ta solicita ambulance cu maximo urgencia.
Dos ambulance a presenta y mesora a start e protocol, pa cuminsa reanima.
Locual a sosode
Na e sitio nos por a mira autonan di Elmar y despues di DOW.
E cabayero aki di un compania priva semper ta corta e matanan pa Elmar, pues segun e compania e no ta desconoci cu e trabou.
Durante cu e tawata ariba cortando e matanan cu a crece rond di un di e wayanan di coriente, e tool cu e tawata tin a mishi cu esaki.
E colega na tera mesora a baha e bucket, unda cu e la mira cu e homber no tawata reacciona mas y ta bati alarma.
Apesar di e trabou di Paramediconan, nada mas por a wordo haci pa cabayero cu a lanta trempan pa haci su trabou, cu ta corta matanan halto. Un trabou peligroso si bo mester corta cerca di wayanan di coriente.
No a keda nada mas pa avisa dokter y e otro departamentonan, na e sitio Janina di Slachtofferhulp tambe a yega y mester a warda ariba dokter Forensico.
E cabayero cu a fayece ta Patrick Alvin A. Thode 25 – 9 – 1965 e tin 58 aña.
Nos ta manda palabranan di forsa y condolencia na su famia den e momentonan duro aki.
