Segun Tromp-Lee tabata for di 2013 el a keda involucra na e lucha aki. Tromp-Lee ta corda con e tempo ey e la participa y yuda na e colecta y accion di firma “Un firma pa un yiu di tera”. E tempo ey tabata enfatisa e inhusticia den nos sistema legal cu tabata haci imposibel pa yiunan di tera cu studia den regio traha como doctor of profesional den cuido aki na Aruba.
Tromp-Lee ta indica cu e tempo ey, yiu di su primo tabata studia na Costa Rica y e tabata haya inhusto cu un yiu di tera cu studia pa doctor den nos region, manera na Costa Rica, Colombia of otro, no por di ningun forma logra traha na Aruba como doctor. Tin ehempel di un top doctor, yiu di tera, cu no por a regresa su isla y mester a keda den exterior y aya eherce y hasta destaca den su trabou.
Tromp-Lee ta di opinion cu un buraco den nos leynan no tabata percura pa tin e caminda di cana pa por logra e acreditacion necesario. Ya desde e tempo ey MEP a pone como prioridad pa cambia esaki. Tabata un caminda largo cu a tuma Gobierno hopi tempo pa busca tur e consehonan necesario, studia e mihor solucionnan y tin ora hasta kibra cabes y negocia pa haci e cambionan necesario. Tur esaki pa haci posibel cu nos yiunan di tera awor si, por cana un caminda defini pa logra entrada na e mercado laboral medico di Aruba.
Cu e firmamento aki, Gabinete Wever-Croes II a duna contenido real na Arubig. Danki na e trabounan duro y vision di gobierno, specialmente di Minister Dangui Oduber, awor tur profesional di cuido cu a studia den regio y studiantenan sa e caminda cu mester cana. Mediante Arubig a crea posibilidadnan concreto y defini pa nos yiunan di tera, mientras ta percura pa e mesun nivel halto den cuido cu pueblo ta exigi y ta desea.
Un pabien special na dokter di wowo Vanessa Wolter cu ta trahando na Imsan y fisioterapista sra. Nanda Braemer trahando na Saba, cu ta e dos prome profesionalnan di cuido cu a ricibi nan decreto pa wordo inscribi den nos registro di Arubig.
Parlamentario drs. Shailiny Tromp-Lee (MEP)
