No tin ningun hende cu por tapa locual Dios kier saca na cla, no tin ningun hende cu por stroba man di Dios move, e unico cos cu Dios ta pidi di nos ta Humildad Y Obediencia.
Ora e dos cosnan ey ta presente den nos bida, nos no tin mester di pleita ni discuti pasobra Dios mes lo bringa pa nos.
No tin nada cu por danja un curason puro y recto, no tin nada pa stroba bendicion di esnan cu ta cana den lus di Dios.
Cueba di Leon no por a wanta Daniel, candela no por a kima Sadrac, Mesac y Abednego, Goliat no por a cana David, y awe si bo ta pasa den cualquier situacion incomodo, e lus di Dios, e berdad di Dios, e pas di Dios lo guia bo caminda, y kita tur baranca y haci bo caminda liso.
No tin motibo pa preocupa, ora bo sa ken bo ta, y cu ken bo ta cana, pasobra si bo ta cana cu Dios , semper por bini atake di e enemigo, pero Dios lo librabo di tur cos, pasobra bo ta den e luz di Dios.
Aunke con scur e nubia di maldad por ta , e lus di Dios ta penetra, no ta importa cuanto contrincante bo tin, e bataya ta di Senjor, para keto y wak riba Senjor, spera riba dje y e lo bringa pa bo.
Tur cos nos por den Cristo , Kende ta duna nos fortaleza, Dios nunca ta yega laat, y Dios no ta laga nada na mitar, tur promesa di Dios ta cumpli y tur ta Si y Amen.
Ta Dios ta esun cu ta lanta hende cu a cay, ora tur hende por bandonabo,Dios tey cu bo pa demostra cu e ta Dios, semper Dios tin recurso, y semper Dios tin salida.
Lanta riba y cohe e rapport di dokter y pone dilanti di Dios, bay na bo rudia y presenta bo caso dilanti di Dios, pasobra Dios tey pa nos tur hamas lo e laga e husto desampara.
Dilanti di Dios, berdad lo topa cu berdad, pasobra nada no ta bay keda scondi, pasobra e presencia di Dios den bo bida, ta mas grandi cu tur esnan cu ta contra bo, y hasta diabel sa esey.
Na unda mi por bay for di Bo Spirito?
Ma unda mi por huy bay for di bo presencia?
Si mi tuma hala di marduga, si mi bay biba den partinan mas aleha di laman.
Ayanan tambe bo man lo guiami, y bo man drechi lo cohe mi tene. ( Salmo 139:7-10).
E wowo di Senjor ta caminda vigilando malo y bon.) Proverbionan 15:3).
Ami Senjor ta scrudinja curason y Mi ta samina mente,pa duna cada un segun su conducta, segun e fruta di su hechonan.( Jeremias 17:10).
Tur momento cu nos mester di yudansa di Dios, nos mester hinca tur cos den su man, y no sigi lucha riba nos propio forsa, no sigi den nos propio entendimento, pero confia Dios, pasobra manera e solo ta sali mainta cu su rayonan di claridad, asina berdad lo sali na cla, y ningun hende por sconde.
Hesus a bisa Ami ta e caminda di berdad y e bida, ni un hende por yega cerca e tata, si no ta pa medio di Mi.
Hesus a bisa Ami ta e lus di mundo, esun cu cana cu Mi lo no ta den scuridad.
Pesey nos mester cana cu Cristo Hesus, laga E tene nos man, laga E ta nos guia.
E por , E tin poder.
Sinceramente, Pastor Marcel Balootje
