E palabra di Dios ta bisa nos cu cielo y tera lo pasa, mas Dios su palabra lo no pasa. ( Lucas 22:33)
Den Job 42:2 Job ta bisa Senjor: Mi sa cu bo por haci tur cos, y cu ningun di bo propositonan no por wordo stroba.
Hopi biaha nos ta laga palabra di hende influencia nos bida, y nos ta tuma palabra di hende haci nos base di confiansa, anto nos ta lubida ken ta Dios den nos bida.
Wak bon e muher cu fluho di sanger pa 12 anja den Marco 5 a tuma un decision cu a cambia henter su bida, ora e a tende di Hesus, kico Hesus ta haci e no a duda ningun momento e a bisa; Si mi mishi cu su mantel lo mi ta sana, e a mishi cu e mantel di Hesus, y a sinti inmediatamente sanacion den su curpa y e a wordo libra di su afliccion.
Y pa confirma tur cos Hesus mes a bise: Mi yiu bo fe a salbabo, bay na pas y sea libra di bo afliccion.( Marco 5:34).
Awendia hopi hende ta laga palabra negativo, trece decepcion den nan bida, pasobra e enemigo sa cu palabra negativo, y actitud negativo ta tranca crecemento spiritual, pasobra semper e persona ta keda manera un baby, pasobra e no tin curashi pa dal un paso di fe.
Tin hopi hende cu kier bira comerciante, negociante, y tin nan propio negoshi, pero esey no ta nifica solamente cu banco a aproba bo fiansa, pero awor abo mester tin curashi pa tuma e paso di fe y drenta den e negoshi, pasobra technologia moderno no por negocia pa bo, ta bo fe y bo curashi ta hibabo na victoria.
Miedo no ta hiba hende ningun caminda pasobra miedo no ta di Dios, Dios no a duna nos un Spirito di miedo.pero un Spirito di poder y un mente sano.
Unabes cu Dios ta bisa cu nos curpa ta tempel di Dios y cu e Spirito di Dios ta biba den nos, tur cobardia tin cu sali na careda, tur bobedad y duda mester baha na awa, pasobra caminda e Spirito di Dios ta eynan tin libertad.
Ta e bendicion di Senjor ta haci rico, y E no ta agrega tristesa na dj’e,(Proverbionan 10:19).
E enemigo a bin solamente pa horta, pa mata y pa destrui, y nos tin cu tene bon cuenta cu esey pa nos no habri porta pa e enemigo, y sembra duda den nos curason, pasobra e enemigo conoce e palabra di Dios, y e sa cu esun cu duda no por ricibi nada, pasa e no ta reconoce e capacidad di Dios.
Ta hopi distraicion tin den mundu actualmente, especialmente cu imitacion, y cosnan artificial. pero laga nos corda un cos cu nos Dios no ta artificial, ni tampoco filosofico, tampoco enganoso, Su palabra ta fiel y berdadero pa siglo y siglonan y pa eternidad.
Pesey e plan di e enemigo ta pa fria hende, troce e palabra di Dios, saca hende for di e naturalesa cu Dios a crea nan den dje y asina hinca nan den un mundo di fabula y hipocrecia.
Ora e man di Dios ta riba nos bida y e palabra di Dios ta goberna nos curason, e radar di diabel no por capta nos movecionnan, pasobra nos ta move completamenta for di e zona di di duda.
Dios danki pa bo man y bo palabra cu ta guia nos bida, na un exito grandi y completo. Sinceramente, Pastor Marcel Balootje
