Miembro di Parlamento pa AVP John Hart a pone un fuerte y emotivo yamada den Parlamento di Aruba tocante e situacion preocupante cu hopi di nos grandinan ta enfrentando diariamente. Segun Hart, e realidad actual ta pidi reflexion profundo y accion inmediato.
“Hopi di nos grandinan ta enfrenta reto diariamente di isolacion, negligencia y te hasta di inseguridad y silencio. Nan no por comunica loke nan ta pasando aden. Un punto di reflexion cu Parlamentario Hart a trece durante e reunion den Parlamento ta cu si esaki ta un falta di compasion di nos como sociedad pa cu nos grandinan, of kizas cu e maneho financiero y/of leynan no a keda pareu cu e compas moral cu nos mester tin pa nos grandinan.”
Hart a subraya cu e manera cu un sociedad ta trata su grandinan ta un refleho directo di su balor moral. “Cu ki curazon nos ta tratando nos grandinan y con esaki ta refleha bek den nos leynan y nos maneho? El a recorda cu na 2015 un ley a pasa den Parlamento cu ta un fundeshi grandi pa e cuido di adulto mayor, e Landsverordening Verzorgingstehuizen, un ley cu a sali for di e vision di Gabinete Eman II pa tin miho cuido pa nos grandinan. Hart a indica cu e ley aki a marca un cambio di direccion importante, pero cu implementacion y continuidad ta esencial.
Mescos na na 2015, Parlamento di Aruba lo ta na un crusada historico un bes mas cu un iniciativa di ley importante cu Gobierno di Aruba a anuncia cual ta e Landsverordening Langdurige Zorg Aruba.
“Ta nesecario pa nos den Parlamento di Aruba hiba un debate riba un sistema mas social y duradero di cuido pa nos grandinan. Esey ta tipo di discusion cu mester hiba pa wak con e espacio financiero cu tin, specialmente den AZV por contribui na un cambio positivo pa nos grandinan; con por duna bek na un manera concreto na nos grandinan,” Hart a declara.
Segun Hart, e situacion actual no ta algo cu por ignora. “Un realidad grandi ta cu nos tin un problema cu birando continuamente mas urgente. Si nos no haci algo, e ta bay bira un monster. E data pa cu costo di cuido di adultonan mayor na Aruba ta alarmante, e no ta un problema di awor”.
Hart a enfatisa cu prevencion y sistema integral di cuido mester forma parti di e enfoke. Den e marco di su intervencion, Hart a plantea preguntanan concreto na minister di salubridad: “Minister por a splica concreto e marco legal di e iniciativa di ley langdurige zorg Aruba?, Minister por splica Parlamento cual ta e pasonan cu ta tumando den cuadro di kwaliteitseisen pa eleva calidad di cuido na Aruba? Minister por splica cua ta e plan actual di minister su maneho pa centronan di pasadia?”
Segun John Hart, nos tin un responsabilidad moral y legal pa garantisa cu nos grandinan por biba cu dignidad, proteccion y cuido real.
