Diahuebs mainta Hues a dicta sentencia den e caso penal cu Minsiterio Publico a cuminsa contra e señora S.d C., su yiu homber M.S.R., su yiu muher E.V.A. y su ex pareha K.M.F. Den sala di Corte tabata presente, señora S.d C., su yiunan M.S.R. y E.VA.
SOLO DI PUEBLO por a compronde cu S.d C. a wordo haya culpabel di malversacion y labamento di placa di 3.2 Miyon Florin di placanan di clientenan cu tabata pag’e pa regla asuntonan di belasting.
Tratamento di e caso aki a cuminsa aña pasa caminda ta acusa S.d C., como experto riba asuntonan di belasting, di malversacion, estafa, labamento di placa di 4 cliente cu e tabata yuda cu asunto di Belasting. Esaki tabata den e periodo di 2017 pa 2022. S.d C. tabata haya placa di e clientenan pa regla asuntonan di belasting, pero S.d C. tabata usa e placa pa asuntonan personal.
MALVERSA CLIENTENAN 3.2 MIYON FLORIN
Hues a bisa cu S.d C. a admiti tur cos. Tin diferente clientenan cu a haci denuncia na Polis cu a duna placa na S.d C. como experto di belasting pa regla nan asuntonan pero a resulta cu S.d C. a usa nan placa pa su mes. S.d C. tabata convence e clientenan pa manda placa p’e.
Hues a bisa cu en total, ta mas o menos 3.2 Miyon Florin, S.d C. a haya di clientenan. El a manda mas cu 530 mil florin pa cuenta di su yiunan y ex pareha. Hues a bisa cu S.d C. no tabata traha cu recibo pues no por saca afor con el a gasta e sumanan cu el a malversa.
3 AÑA Y 8 LUNA DI PRISON
Pa cu e castigo, Hues a bisa cu S.d C. ta culpabel di fraude na gran escala. A abusa di confianza di clientenan cu a dun’e placa pa paga belasting. Hues a bisa cu no tin claridad unda e placa a bay. E hecho aki a pone cu clientenan a haya boet y haya problema cu Departamento di Belasting. Hues ta haya cu esaki a sosode den un periodo largo y un cantidad di victima. Hues ta haya cu e exigencia di Fiscal esta 4 aña di prison, ta na su lugar .
Sinembargo, Hues ta tene cuenta cu e critica di defensa cu Ministerio Publico a surpasa e tempo pa persigui e sospechosonan.
Esey a haci cu Hues a baha e castigo di 4 aña (48 luna), na 44 luna di prison. Ta asina cu S.d C. ta liber pero lo mester bay sinta e castigo.
DEMANDANAN DI PAGO
Hues a bisa cu tin demanda di e clientenan. Hues ta haya cu mester declara diferente di e demandanan no admisibel pasobra no tin splicacion di sumanan. Hues a bisa cu S.d C. a firma un documento di ta para responsabel di daño di 3 Miyon Florin y si e no cumpli e lo mester bay 200 dia sera. Hues a menciona cifranan di demandanan cu a wordo aproba y cu el a pone medida di pago.
MESTER PAGA BEK MAS DI 87 MIL FLORIN
Pa loke ta e demanda di kita propiedad cu Fiscal a haci, Hues ta haya cu en principio 87.819,24 florin, ta loke S.d C. lo mester paga bek. Esaki ta kita tur e demandanan di clientenan for di e 3.2 Miyon Florin.
YIU HOMBER Y YIU MUHER CONDENA
Hues ta haya e yiu homber di S.d C., M.R.S., complice di labamento di placa. Hues a mustra cu S.d C. tabata manda placanan riba cuenta di su yiu M.R.S. A constata cu e placanan aki ta procedente di labamento di placa. Aunke cu M.R.S. ta bisa cu e no sa di nada, Hues no ta kere esaki. Hues a mustra cu durante mas cu 1 aña y 6 luna, M.R.S. tabata haya placa di su mama S.d C. y e tabata lanta e placa for di su cuenta y hiba e placa cash pa su mama. Hasta Aruba Bank a hala su atencion y kier a sera su cuenta. Hues a condena M.R.S. na 6 luna di prison.
Hues a sigui cu e yiu muher, e dama E.V.A., kende tambe tabata haya placa riba su cuenta di banco for di S.d C. Hues a bisa cu E.V.A. tabata haci mesun cos cu M.R.S. esta, lanta e placa y hiba placa cash pa e mama. Hues no ta haya E.V.A. culpabel di complice di labamento di placa, pero si cu E.V.A. por a controla e circulacion di placanan y ripara cu e no tabata haci bon. Esaki ta haci E.V.A. culpabel di labamento di placa pero no intencional. Hues a condena E.V.A. na 54 ora di trabao pa comunidad y si e no cumpli e lo mester bay 27 dia sera.
EX PAREHA DECLARA LIBER
E ex pareha di S.d C., e homber K.M.F., tambe ta wordo sospecha di labamento di placa. Hues a mustra cu 112 mil florin a bay riba K.M.F. su cuenta. Investigacion ta mustra cu K.M.F. a facilita su carchi di banco na S.d C. K.M.F. no tabatin bista kico tabata sosode riba su cuenta. Hues ta haya cu no tin indicacion cu K.M.F. tabata sa kico S.d C. tabata haci. Hues ta haya cu mester declara K.M.F. liber.
