E misterio di e monolitonan metalico cu a aparece den varios parti di mundo a yega Spaña. E fin di siman aki a localisa otro di e obranan aki den e municipio di Ayllon, den e provincia di Segovia, den centro di e pais.
Segun a confirma e propio Consistorio di e localidad, e monolito a wordo haya den ruinanan di e Misa di Santiago y te asina leu, ta desconoce con el a aparece eynan.
Desde su aparicion, cientos di persona a acudi na e luga pa saca su potret. Sin embargo, Ayuntamento ta pidi e ciudadanonan pa evita bishit’e, ya cu e zona no ta prepara y por ta “perhudicial y peligroso.”
“Cerca tin luganan caminda cu un persona por cay,” el a remarca. Ademas, ta apela na e “responsabilidad individual” den cuadro di e pandemia.
Ya ta cinco monolito
Te asina leu a aparece, plama rond mundo, otro cinco monolito. E prome di nan a wordo haya den e estado di Utah, na Merca, cu a wordo retira pa un grupo di activista medioambiental.
Posteriormente a aparece otro na fin di november den e parti noordwest di Rumania, tambe retira; e di tres a wordo localisa siman pasa na e costa di California; mientras cu recientemente a hay’e tambe na Hulanda y na Reino Uni.
Aunke ainda tin duda riba e origen di e structuranan aki, cu hasta algun hipotesis ta atribui na “extraterestre”, parce cu e responsabelnan ta un grupo di artista Mericano autodenomina The Most Famous artist, cu diabierna a pone riba rednan social potret riba e proceso di creacion, transporte y prijs di e obranan aki.
“Ki miho manera pa caba cu e aña fastioso aki cu laga mundo pensa brevemente cu extraterestrenan a contacta cu nos pa despues keda decepciona cu no tabata mas cu un accion nobo di The Most Famous Artist,” e fundador di e grupo, Matty Mo, a afirma riba e website Mashable.
