Tur locual ta stress y depresion ta bini for di obranan di carni, ta bini for di desobedencia na e palabra di Dios.
E ta para scirbi den Galationan 5:19-21, cual ta mustra nos e danjo cu por wordo causa na nos salud mental y nos bida spiritual ora nos ta laga obranan di carni domina nos bida.
Ora e carni ta domina nos bida, nos salud mental ta na peliger, pasobra segun nos activa e carnalidad den nos bida. nos ta habri porta, pa e enemigo haci locual cu e kier.
No lubida cu ora un persona kere den cu curason, y confesa cu su boca cu Cristo Hesus ta Senjor, y cu Dios a lan’E for di morto e lo ta salba, su curpa ta bira tempel di Spirito Santo di Dios, pasobra Spirito Santo ta bin biba den e persona ey.
Asina cu e Spirito di Dios ta den bo bida, bo tin defensa contra tur locual e enemigo ta ofrece pa bo carni. Tene bon cuenta kico bo ta lesa den Galationan 5:19-21) esaki no ta djis algo pa lesa pero algo pa lesa pa comprendemento, pasobra ora nos biba den e cosnan aki e ta causa stress y depresion cual ta pone nos salud mental na peliger.
Pesey Dios a duna nos palabra di forsa y poder pa asina nos por pone tur cos den Su man y e lo maneha nos salud mental.
Humiya boso mes anto, bao di e man poderoso di Dios, pa e por halsa boso na e tempo apropia, tirando tur boso preocupacion riba dj’E pasobra e ta percura pa boso.( 1 Pedro 5:6-7).
No preocupa pa nada, ma den tur cos,pa medio di oracion y suplica cu gradicimento, laga boso peticionnan ta conoci dilanti di Dios,y e pas di Dios,cu ta surpasa tur comprendemento , lo warda boso curason y boso mente den Cristo Hesus.( Filipensenan 4:6-7).
Pasobra e armanan cu nos ta bataya no ta carnal, ma poderoso den Dios pa basha fortinan abao.Y pa destrui speculacionnan y tur arogancia cu ta wordo lanta, contra e conocemento di Dios,hibando den cautiverio tur pensamento, pa haci nan obedecido na Cristo.( 2 Corintionannan 10: 5-6).
Pas Mi ta laga pa boso, Mi pas Mi ta duna boso, no manera mundo ta duna, Mi ta duna boso.no laga boso curason bira intrankil, no lage tene miedo.( Juan 14:27).
No tene miedo, pasobra Mi ta cu bo, no desmaya , pasobra Mi ta bo Dios. Lo Mi fortalese bo,si lo Mi yuda bo, si lo Mi sostene bo cu Mi man drechi di husticia.( Isaias 41;10).
Senjor ta serca e hende di curason kibra, y ta salba esnan di curason abati.( Salmo 34:18).
Romanonan 8:1-4, ta bisa: Pesey awor no tin condenacion pa esnan cu ta den Cristo Hesus.
Tur hende mester realisa cu ora stress ataca bo bida, cohe un Bijbel y bay na Galationan 5:19-21 y bay na 1 Corintionan 6:9-10 y despues bay na Romanonan 1:26-32 y samina bo mes, y wak si bo tin un di e sintoma nan aki ta aparece den bo bida, y arepenti, confesa bo pica y aparta di locual ta wordo menciona, y entrega bo bida na Cristo Hesus y bo salud mental lo wordo fortifica.
Pasobra caida di hende den pica ta debilita na salud mental, pasobra ora nos busca e fundeshi di e atake riba salud mental di hende, e ta cuminsa na nan desobedencia na e palabra di Dios.
E palabra di Dios tin forsa pa cuida nos salud mental. Sinceramente, Pastor Marcel Balootje
