Pasobra e palabra di Dios ta bibo y activo, y mas scherpi cu cualkier spada di dos filo,y ta penetra te na e division di alma y spirito,i di scharnier y tuti,y ta capas pa husga e pensamentonan y intencionnan di curason.Y no tin ningun criatura scondi pa Su bista,ma tur cos ta habri y bisto dilanti di wowo di Esun cu nos tin di haber cun’E.( Hebreonan 4:12-13).
E palabra di Dios tin poder pa cambia bida di hende maske cuanto nan wordo gaña door di e enemigo, pasobra e palabra di Dios tin poder pa lanta morto, kibra maldicion, trece sanacion, trece liberacion, corre cu droga y tur otro tipo di adiccion.
Dicon hopi no kier tende e palabra di Dios y ta prefera cambia e berdad di Dios pa un mentira, pasobra nan sa cu den e palabra di Dios tin e poder pa transforma biba, y pa saka nan for di tur clase di bagamunderia, inmoralidad, y perversidad y trece nan bek na sano huicio.
E palabra di Dios ta bisa nos den Romanonan 12;2: Y no sea conforme e mundo aki, ma sea transforma pa medio di e renobamento di boso mente,pa boso por comproba,kico ta e bon y agradabel,y perfecto boluntad di Dios.
E palabra di Dios ta e solucion perfecto pa tur esnan cu ta sufri di depresion, causa door di envidia y amargura, y tambe esnan cu tin problema di salud mental causa pa e enemigo y su compinchinan.
E palabra di Dios tin poder pa restaura mente y curason di tur esnan cu ta bruha den nan identidad, esnan cu tin dobbel identidad , y lo trece nan bek den e perfecto boluntad di Dios pa nan bida.
E palabra di Dios tin poder pa trece liberacion for di tur tipo di bruheria y satanismo, y asina trece e ser humano na arepentimento, cambia e bida , caminda diabel tabata goberna y hacie un servidor di Dios.
Pasobra Dios no a duna nos un spirito di temor, sino di poder, y di amor y di sano huicio.( 2Timoteo 1:7).
Pasobra e armanan cu nos ta bataya cune, no ta carnal,ma poderoso den Dios pa basha fortinan abao, y pa destrui tur speculacion y tur arogancia cu ta wordo lanta contra e conocemiento di Dios, hibando den cautiverio, tur pensamento, pa haci nan obedesido na Cristo.Y nos ta cla pa castiga tur desobedencia unabes cu boso obediencia ta completo.(2 Corintionan 10:5-6).
Tur scritura ta inspira pa Dios, y ta util pa siñansa, pa reprendemento, pa coreccion,pa educa,den husticia, pa e hende di Dios por ta perfecto, ekipa pa tur bon obra.( 2 Timoteo 3:16-17).
Laga boso conducta ta excelente meymey di e paganonan, asina cu ora nan calumnia boso,como malechor, nan por, pa medio di boso bon obranan cu nan ta observa, glorifica Dios den e dia di bishita,( 1 Pedro 2:12).
Mal pensamento, palabra negativo, no ta trece ningun speransa pa nos bida, pasobra no tin crecemento den negativismo, bo palabra ta pusha bo yega bo meta, Si bo palabranan diariamente ta negativo, bo bida lo bay atras, pasobra locual bo confesa cu bo boca esey bo ta.
Cu bo mes boca bo ta declara avance y cu bo mes boca bo ta declara cu cos ta stanca.
Ta dificil papia malo y ricibi bon, pasobra tur locual un hende sembra esey e ta cosecha.
Den tur locual nos ta papia nos mester tene cuenta cu Filipensenan 4:8-9, pasobra tin gran enseñansa den e versiculonan ey pa henter nos bida.
Sinceramente, Pastor Marcel Balootje
