Amor pa placa ta pone hende ganja, horta, y hasta mata, pa asina mantene nan posicion di rikesa y aleha nan mes completamente for di Dios.
Den Lucas Capitulo 15:11-32 ta mustra nos con amor pa placa por pone un yiu pidi su tata e parti di su herencia y bandona cas sin ningun clase di experiencia y bay biba den un tera leu,y gasta tur placa, asina cay den un situacion cu e mester a bay traha caminda ta cuida porco y a desea di come cuminda di porco, asina doloroso su situacion tabata.
Pero laga nos tur corda cu tempo e tabata na cas di su tata , e no tabata falta nada, pesey ora e a bin bij y a bolbe cas bek, su tata a dune locual ta di dje, pa demostre cu aunke e a bay, e amor di tata si no a bandona su bida, y su tata a restaura su bida completamente, bisando: Pasobra e yiu di mi aki tabata morto, y a bolbe biba, e tabata perdi y a wordo hanja.
Cuanto hende awendia no ta perde nan integridad, nan libertad, nan matrimonio y nan famia pa motibo di placa, cuanto no ta bende nan mes y nan famia, of nan coleganan di trabao pa motibo di placa.
Cuanto hende cu bon trabao y bon beneficio ta cay trampa diabolico di placa, y ta laga placa domina nan bida, y hinca nan mes den un caya di corupcion sin salida.
Nos por mira con gran dictadornan rond mundo ta yena cu placa, pero no kier bandona nan poder, pasobra e amor pa placa ta rais di tur maldad, y esnan cu cay den dje ta solamente Cristo Hesus tin e poder di por libra nan.
Amor pa placa ta haci hende orguyoso y egoista, y nan ta lubida cu nos no a trece nada den mundo y nos no por hiba nada for di dje tampoco.
Instrui esnan cu ta rico den e mundo actual, pa nan no ta soberbe y pa nan no fiha nan speransa riba e inseguridad di rikesa, ma riba Dios,Kende ta provee pa nos tur cos na abundancia,pa nos disfruta di nan. Instrui nan pa haci bon, pa nan ta rico den bon obra,pa nan ta generoso y dispuesto pa comparti, pa nan montona pa nan mes e tesoro di un bon fundeshi,pa futuro, pa nan gara na loke ta e bida berdadero.( 1 Timoteo 6:17-19).
Amor pa placa ta pone hende halsa y stima e placa mas cu Dios.( Marco 10:17-22).
Amor pa placa ta trece preocupacion y ta hiba hende na destruccion ( 1 Timoteo 6:9).
Amor pa placa ta haci hende orguyoso, pichiri, y egoista .( 1 Juan 3:16-18).
Amor pa placa por haci hende temporalmente ciego cu nan ta pensa solamente riba nan mes. ( Lucas 12:18-21).
Nos mester sinja nos yuinan con ta usa placa, nos mester bisa nan cu placa ta necesario den nos bida, pero e cos mas importante ta cu nos tin cu bisa nan cu si bo kier yega na placa bo mester studia bon pa bo tin un bon trabao of bira un homber di negoshi pa bo yega na placa.
Pero no laga placa domina bo bida, especialmente locual ta sosode awor aki cu nos hubentud ta laga placa domina nan, y no ta pensa ningun momento ora nan mester hinca nan curpa den problema pa placa, pasobra nan ta pensa pa yega facilmente na placa.
No laga den ningun circumstancia, placa domina bo bida,y asina bo lubida cu Cristo ta bo Salbador.
Sinceramente , Pastor Marcel Balootje
