Cu corazon kibra
yena cu dolor y tristeza
mi ta mira bek ariba e anochi scur
na unda mi bida a wordo ranca.
Un aña a pasa bay.
Y asina a pasa hopi mas.
Ya nos ta atrobe 25 di Januari 2021,
na unda husticia lo wordo proclama.
Hopi a yora y hari,
ariba mi buelo pa cielo.
Pero niun momento
mi a bandona mi pueblo.
E speranza pa solucion tey
y pa divulgacion.
Mas mi no por bisa
ariba mi bida celestial.
Riba mi fecha natal
mi ta wak e culpabel.
Mi sonrisa tey keto bay,
hunto cu Dios Tata.
Mi alma ta resona :
“O, Aruba Dushi Tera”
Mi grito pa libertad ta sclama:
“E Flor di Libertad”.
Mi ta habri mi wowo
y mi ta mirabo bon bon!
Bo sa cu mi sa
cu ta abo ta esun!
Mi orguyo ta mi pais!
Sentimentonan pa un baranca soberano,
ta hasi di mi “Bo Libertador”;
e personahe di siglo 20.
Ken a bisabo cu mi a bay sosega?
Despues di ta morto mi a traha mi plan:
lucha, husticia, soberania y amor:
pa mi pueblo natal, mi paraiso den Caribe.
Mi sacrificio di morto
ta pa e liberacion di mi pueblo.
Mi lucha ta pa husticia
definicion di mi morto!
Cu lagrimanan mi ta wak,
inundacion di mi pueblo:
Den poder, placa y mente organisa
E amor pa mi baranca lo libera mi pueblo di wordo husga
Bientonan fuerte lo suta mi pais!
Awa torencial lo bati mi pueblo!
Pero mi baranca Aruba,
lo tey keto bay!
E berdad di mi morto lo wordo ranca,
for di lenganan aheno na nos libertad!
Cobardia, herencia di famia
lo kibra e tradicion politico!
No tin paz den mi alma.
Mi isla ta na rudia
door di gas y petroleo
manera “Oro Hubo” den pasado.
Awe 25 di Januari,
Mi ta avisabo
cu mi ta na caminda
pa regla mi asunto.
E asunto di nos dos
cu abo sa y ami sa
y e pueblo lo haña sa
cu ta abo mes ta esun!
Fiesta mi fecha natal
ariba bo consenchi.
Mi pueblo stima,
e lucha ta pa husticia awor!
Felis dia di Betico!
Dicta pa Betico Croes
Scirbi pa Melinda Wouter
Dia 19 di Januari 2021
