Salmo 14:1 ta para scirbi: E bobo ta bisa den su curason”No tin Dios”nan ta corumpi, nan a comete hechonan abominabel, no tin ningun hende cu ta haci bon.
Esaki ta locual ta pasa tur dia, ora bo trata di coregi un persona, mesora e ta busca tur forma di sconde tras di otro hende y no arepenti y drecha asunto cu Dios.
Pa hende keda biba den scuridad y den maldad nan ta rechasa Dios, y ninga su existencia, pero Dios den su inmenso amor ta stima nos tur.
Ora nos mira cuanto hende ta desvia for di caminda di Dios, y busca e caminda hancho, yen di inmoralidad y mentira, nos ta pidi Dios tene misericordia, pasobra Dios a prepara un plan di bondad pa nos tur.
E plan di bondad di Dios ta asina perfecto cu si un hende no ta den dje, ta pasobra e mes no kier ta den dje , pa motibo di ignorancia, bobedad, rechaso di Dios, falta di temor di Dios,inmoralidad etc.
Den Juan capitulo 15 Hesus ta bisa: Ami ta e berdadero mata di wijndruif y Mi Tata ta e cunukero.
Tur rama den Mi cu no ta carga fruta, E ta kita,y tur esnan cu ta carga fruta, E ta snui, pa esaki duna mas fruta.
Aki nan Hesus ta splica e importancia pa nos bida ta den Cristo, pa asina nos por participa den e plan di bondad di Dios.
Keda den Mi y Ami den boso.
Mescos cu e rama no por carga fruta di su mes, si e no keda den e mata di wijndruif, asina boso tampoco si boso no keda den Mi.
Tur locual cu hende purba haci sin Señor lo no ta di beneficio, pasobra solamente den Señor nos por duna fruta tanto spiritual, social y fisico.
Y hendenan lo mira esaki y reconoce cu ta Dios a hacie.
Ami ta e mata di wijndruif y boso ta e ramanan , esun cu keda den Mi, y Ami den dje, lo duna hopi fruta , pasobra separa di Mi,boso no por haci nada.
Si un hende no keda den Mi, e ta wordo tira afo manera un mata y e ta seca, y hende lo recohe nan y tira nan den candela, y nan ta wordo kima.
Si boso keda den Mi y Mi palabranan keda den boso, pidi tur loke boso kier y lo e wordo haci pa boso.
Den esaki Mi Tata ta wordo glorifica, cu boso ta carga hopi fruta y asina demostra di ta Mi disipelnan.
Wak e gran diferencia entre scuridad, y e lus di Dios, wak e diferencia entre bon y e malo, pero hende tin di scohe cual banda na kier ta, pasobra den asunto di Dios, nos tin di stop di corre bini serca Dios ora cos ta malo y bolbe bay bek den mundo ora cos ta bon.
Ta hopi doloroso pa haci bofon di Dios, pasobra tur esnan cu a purba a resulta cu ta di nan mes nan ta haci bofon.
Dios a traha hende den su imagen y semehansa, Dios a traha hende pa multiplica ,yena, y goberna e mundo.
Ma tur esnan cu a ricibi’E, na nan E a duna derecho, pa bira yuinan di Dios, esnan cu a kere den Su nomber.(Juan 1:12).
Pasobra tur esnan cu ta wordo guia door di e Spirito di Dios esey nan ta yiu di Dios.(Romanonan 8:14).
E Plan di bondad di Dios ta pa tur hende, pero di berdad tur hende kier e plan?
Sinceramente, Pastor Marcel Balootje.
