E palabra di Dios ta bisa cu e ladron ( e diabel) ta bini solamente pa horta, pa mata y pa destrui, Ami a bini pa nan tin bida y pa nan tine na abundancia. Ami ta e bon wardado, e bon wardado ta duna Su bida pa e carnenan.( Juan 10:10-11).
Nos tin cu biba nos bida cu sabiduria, pa nos conoce e proposito di Dios pa nos bida, y pa asina cosnan no ta canando bon , nos comprende cu e cos ey no ta di Dios.
Dios nunca ta hinca bo den un caminda pa bo trompica, of pa destrui bo bida, Dios nunca lo hiba bo na fracaso, pasobra Dios ta stima bo cu un amor eterno, y E ta prolonga misericordia riba bo bida.
Como hoben Dios nunca lo hiba bo na un bida miserabel, un bida di berguensa, un bida inmoral, pasobra Dios no tin goso den maldad, pasobra Dios ta un bon Dios, y Dios ta amor.
Asina tur hoben por nota cu asina cu cosnan ta bruha, droga y alcohol, inmoralidad, caymento sera cuminsa frecuenta den bo bida, no ta di Dios esey ta, pero e enemigo cu kier destrui bo, pa bo no alcansa e proposito di Dios pa bo bida.
Dios a crea homber of muher y esey bo ta , creacion di Dios, den e imagen y semehansa di Dios, bo ta Dios su preto di wowo, Dios ta stima bo, Cristo Hesus a entrega Su bida pabo, asina ta cu no acepta nada mediocre den bo bida, pasobra Dios a duna bo bo identidad.
Bo no ta riba e mundu aki pa diabel por haci cu bo manera un yoyo bo ta pasobra ta para scirbi:Pasobra Mi sa e plannan cu Mi tin pa boso,Senjor ta declara, plannan pa pas y no pa calamidad, pa duna boso un futuro y un speransa, Anto boso lo sclama na Mi y bin haci oracion, na Mi y lo Mi scucha boso.( Jeremias 29:11-12),
E plan di Dios semper tin un bon futuro den dje. e plan di Dios nunca ta hiba hende atras den nan bida, Dios nunca tin plan pa haci hende bira ladron, y hende bira sinberguensa, haci hende perde respet pa nan mes y pa otro hende, asina cu e cosnan ey ta sosode den bo bida, bo mester busca Dios urgente, pasobra E tin bon plan pa bo bida.
Pasobra nos ta e obra di Su man, crea den Cristo Hesus pa bon obranan, cualnan Dios a prepara di antemano pa nos por cana den nan. ( Efesionan 2:10).
Ta tempo pa tur hoben habri nan wowo y compronde e boluntad di Dios, pa nan bida, pasobra e enemigo ta disfrasa na hopi cos pa hiba hobennan den tentacion , asina hiba nan den caminda di perdicion, pesey como mayor nos mester haci tur esfuerso , pa lanta nos yuinan den e caminda di Senjor.
Esaki ta para scirbi den Santiago 1:13-15:
No laga ningun hende bisa , ora cu e wordo tenta,Mi ta wordo tenta door di Dios.
Pasobra Dios no por wordo tenta door di maldad.
Y E mes no ta tenta ningun hende.
Ma cada un ta wordo tenta ora e wordo atrai y seduci, door di su mes pasion. Anto ora e pasion consebi ,e ta duna lus na pica, y ora e pica keda cumpli e ta produci morto.
Pesey wak bon cu ken bo ta anda, pasobra no laga ningun hende ganja boso: Mal compania ta danja bon custumber ( 1 Corintionan 15:33).
E plan di Dios pa bo bida,ta bondad. Sinceramente, Pastor Marcel Balootje
