Pasobra Dios a stima mundo asina tanto,cu E a duna Su Yiu unigenito,pa ken cu kere den dje, no bay perdi, ma tin bida eterno.
Esaki ta nifica claramente, cu ta depende di hende mes si e ta kere den e Yiu di Dios si of no, si un hende ta serio cu Dios, Dios ta serio cu ne, si un hende ta kere den Cristo Hesus e por disfruta di bida eterna, pero si e no ta kere, e persona ey lo keda bao di condenacion.( Juan 3:18).
Cristo Hesus ta nos seguridad pa bida eterna y tur nos bendicionnan ta den Cristo Hesus.
Si nos no tuma e palabra di Dios na serio e consecuencia lo ta pa nos mes, mescos cu ora nos ta corre un auto sin papel, of ora nos ta neglisha pa disiplina y coregi nos yuinan,
Esun cu kere den e Yiu tin di bida eterno, ma esun cu no obedece e Yiu lo no mira bida,ma e furia di Dios ta keda riba dje.(Juan 3:36).
Cherchamento y bofon di Dios, a bira un obra di arte, pasobra hopi a perde temor di Dios, of no tin at all, y ta sigi haci cosnan cu no ta agrada Dios conscientemente.
Bendiciona sea e Dios y Tata di nos Señor Hesus Cristo,Kende a bendiciona nos cu tur bendicion spiritual den e lugarnan celestial den Cristo.( Efesionan 1:3).
Señor a bendiciona nos cu bendicion spiritual pa asina duna nos forsa pa aparta for di e mundo di scuridad, y no keda esclavo di diabel, y no sigi participa den cosnan cu no ta di Dios.
E a duna nos sabiduria pa comunica cun’E den oracion y alabansa, y e presencia di Su Spirito Santo lo guia nos den e bon caminda, pa nos por papia y cana den e berdad, y asina wordo reconoce como sirbido di Dios.
No ta cumbini nos pa cana den e camindanan bieuw di rabia , odio, arogancia,orguyo y inmoralidad, pasobra den e cosnan ey no tin bida, nan tur ta caminda cu ta hiba na morto spiritual y si nos no paga bon tino y arepenti, nos por alcansa morto fisico.
Nos mester bandona e bida bieu y acepta un bida nobo den Cristo cual ta e unico speransa cu hende por tin pa yega na encuentro cu Dios, pasobra Cristo Hesus ta e unico caminda di berdad y bida, ningun hende no por yega serca e Tata sino ta pa medio di e Yiu.
Hopi promesa e mundo ta ofrece, y tambe hopi caminda, pero ningun di nan no por ofrece locual Cristo Hesus ta ofrece na nos bisando: Bin serca mi tur cu ta cansa y carga y lo Mi duna boso sosiego.
Ta solamente den Cristo tin bida na abundancia y bida eterna, ta solamente den Cristo Hesus tin pas , pasobra Cristo Hesus ta e luz di mundo , esun cu ta sigi Cristo hamas lo cana den scuridad.
Ta tempo pa mayornan, pone tempo disponibel pa guia nan yuinan den caminda di Cristo Hesus, pasobra cada dia nos ta un dia mas serca binida di Cristo Hesus.
No ta tempo pa guia nos yuinan den paranda, pero ta tempo pa guia nan na arepentimento, pa asina nan por alcansa pordon di pica y bida eterna, pasobra dianan ta malo.
Como mayor no solamente nos ta responsabel, pa cuminda y paña pa nos yuinan, pero nos ta yama pa guia nan riba e caminda di Cristo Hesus , e unico caminda di berdad, y e bida, e caminda di salbacion verdadero.
Sinceramente, Pastor Marcel Balootje
