Ta bon pa tur hende sa, cu tur cos cu nos pone den man di Dios, Dios ta Todopoderoso, Dios ta contesta oracion y Dios ta haci milager, no lubida cu nada ta imposibel pa Dios.
Caminda man di hende no por yega, of caminda hende no por presenta , Dios ta yega, Dios ta alcansa y Dios ta trece solucion.
Imaginabo un hende ta haci operacion, despues e ta hala hilo, parti pafo ta mustra bon, pero Dios ta esun cu ta cura esun di parti pa den, pasobra parti di paden man di hende no por yega pa aplica ningun remedi.
Ora un mama ta na estado, man di hende no por alcansa e yiu, tur cos por wordo mira via di echoscan, pero Dios ta esun cu ta duna crecemento y ta pone tur wesonan na lugar.
Hopi biaha hende por encontra nan mes den situacion dificil caminda man di hende no por alcansa, of hende no por bay caminda nan ta pa yuda nan.
Den Genesis Dios a manda 2 angel pa saca Lot for di Sodoma y Gommora pasobra ningun hende por a bay saca Lot.
Den Daniel capitulo 6, Dios a manda un angel bay sera boca di leon. Pasobra e porta di e cueba tabata seya y ningun hende por a yuda Daniel.
Den Hechonan 12 :7-10 Pedro tabata sera, mara cu dos cadena, drumi meymey di dos solda, y guardianan dilanti porta tabata warda e prison. Diripiente un angel di Senjor a presenta, a stoot Pedro na su custia,lante for di sonjo, bisando “Lanta lihe’’ y e cadenanan a cay for di su mannan.
Marco 5:4 ta conta nos e historia di e homber posei pa demonjo, cu aunke e demonjo a bisa cu ta “Legion” nan ta , Hesus a ordena nan pa sali, y nan a pidi permiso pa drenta den un trupa grandi porco,y e trupa di porco a basha careda na un sero steil y bay cay den laman.
Pablo a reprende un mucha muher adivinadora y asina e cu Silas a wordo sera pasobra nan a para e negoshi di maldad, nan a bati nan , tira nan den prison, y duna ordo pa warda nan bon warda, y pone sepa na nan pia.
Mey anochi nan tabata canta Himno di alabansa,na Dios, diripiente a bini un temblor asina fuerte, cu e fundeshi di e prison a wordo sacudi , y mesora e portanan a habri,y e cadenanan di nan tur a los.
E ora ey nan a sclama na Senjor den nan angustia, y e a salba nan for di nan afliccion, E a saca nan for di scuridad y for di sombra di morto, y a kibra nan cadenanan na pida-pida. ( Salmo 107:13-14).
Mi a spera cu pasenshi riba Senjor y E a inclina Su mes na mi,y a scucha mi sclamacion, e a sacami for di e pos di destruccion, for di e lodo di klei, y E a pone mi pia riba baranca y a haci mi pasonan firme.( Salmo 40:1-2)
Ningun situacion cu hende por ta, nunca ta dificil pa Dios, pasobra Dios a primiti cu nunca e lo bandona nos, ni tampoco laga nos desampara.
No haci bo curpa ningun danjo, no tampoco tuma decision decabeya, pero pone bo fe y confiansa den Dios, y Dios libera bo, pasobra Dios, ta grandi fuerte,poderoso y maraviyoso.
Dios ta haci cosnan bon y cosnan exelente, nunca e ta laga e husto desampara,
No tin cadena cu Dios, no por kibra, y no tin enfermedad cu Dios no por sana.
Sinceramente, Pastor Marcel Balootje
