Cristo Hesus a bisa: Cielo y tera lo pasa ma Mi, palabranan lo no pasa. ( Lucas 21:33).
Aunke con duro mentira core , e berdad di Dios lo alcance,y ta tristo, pa hende sigi ninga, pasobra aunke tin hopi cu ta sostene mentira toch un simpel berdad ta basha tur cos abao.
Mirando con scuridad ta avansa riba e mundo aki, con e hende ta trose e berdad, pa nan por hanja nan kier, ta tempo pa tur hende realisa cu mentira por parce bunita, pero na final solamente lo bini tristesa y caida.Pasobra mentira nunca lo triunfa.
Dios no kier pa ningun hende bay perdi, pero pa tur hende yega na e conocemento di e Berdad, pero di otro banda e enemigo cu ta satanas, tin hopi hende su mente yena cu scuridad pa nan no scucha, tende of mira e berdad di Dios.
Cultura nunca por pasa riba e berdad di Dios, mester tene masha cuidao ta ken ta wordo adora ora nos ta papia di cultura, pa cultura no hiba nos den scuridad, y bira idolatria.
No laga nos haci manera e pueblo cu a bay adora e bishe di oro, ora Moises a tarda riba sero di Sinai, y eynan tur sorto di bagamunderia y pica a tuma lugar y te cu awe e cos ey no a cambia.
Pasobra pa adora Dios , hende no tin mester di bebe burachi, baila sunu, disfrasa den perversidad y inmoralidad, y kere cu asina ta bunita, y ta agrada Dios, absolutamente, esey no ta e boluntad di Dios, esey no ta haci Dios contento.
Romanonan 12:1-2 ta bisa:Pesey mi ta roga boso,rumannan pa medio di e misericordianan di Dios, pa presenta boso curpanan como sacrifisio bibo y santo,aceptabel pa Dios, cual ta boso sirbishi spiritual di adoracion. Y no sea conforme e mundo aki,ma sea transforma pa medio di e renobamento di boso mente, pa boso por compronde kico ta e bon y agradabel y perfecto boluntad di Dios.
Acaso boso no sa cu boso curpa ta tempel di Dios y cu e spirito di Dios ta biba den dj’E. Si un hende destrui e tempel di Dios, Dios lo destrui e. Pasobra e tempel di Dios ta santo, y esey ta loke boso ta.( 1 Corintionan 3;16).
Huy for di inmoralidad. Tur otro pica cu un hende comete ta pafor di e curpa, ma e hende inmoral ta peka contra su mes curpa. Of boso no sa cu boso curpa ta e tempel di Spirito Santo. Kende boso tin den boso,y cu boso no ta pertenece na boso mes. Pasobra boso a wordo cumpra pa un preis: pesey glorifica Dios den boso curpa.( 1 Corintionan 6:18-20).
Pasobra esaki ta e boluntad di Dios, boso santificacion, esta pa boso abstene boso di inmoralidad sexual.Pa cada un di boso sa con pa tene su mes curpa,den santificacion y honor, no cu pasion di deseonan carnal, manera e paganonan, cu no conoce Dios.( 1 Thesalonisensenan 4:3-5).
Hopi hende no ta altura cu diabel ta un ladron, un mentiroso, un atracador, ora un hende mester saca riba di mil florin pa su libertad, pa e no bay sera, pa motibo di bebemento y bringamento durante parada di carnaval, e persona ey mester sa cu ta diabel ta hortando su finansas, pa motibo cu e a trose e berdad di Dios y no a respeta Dios, y esey ta su cosecha di su mal conducta.
Dios tene misericordia, pasobra e scuridad tin hopi wowo tapa y hopi mente cu mester ricibi claridad.
Sinceramente, Pastor Marcel Balootje
