Desde hopi tempo caba tin problema pa loke ta trata Landamento Escolar. Tromp-Lee ta indica cu asina e Minister di Enseñansa nobo a huramenta el a sinta cu ne pa trata diferente punto entre nan e situacion di Landamento Escolar.
Segun Tromp-Lee nos ta na final di September y ainda Landamento Escolar no a inicia. Zweminstructeurs ya pa hopi tempo ta biba den inseguridad y ta teme pa nan salario y nan condicionnan laboral cu e ex-minister di Enseñansa kier a cambia unilateralmente. Condicionan bou cual pa añas nan a bin ta trahando. E cambionan proponi ta bay liña recta contra e proceso cu nan a bin ta encaminando pa formalisa nan rechtspositie. Un proceso andando ya pa hopi aña y cu lastimamente ainda no por a keda formalisa.
Landamento Escolar ta un proyecto cu a inicia casi 30 aña pasa y Tromp-Lee ta indica cu sigur su necesidad a keda demostra y su ehecucion semper tabata exitoso. Cu e ta carga e nomber proyecto no ta kita cu ya pa casi 30 aña e ta forma partí structural di e programa escolar pa nos muchanan di derde klas. Pesey mes Tromp-Lee ta hopi contento cu Minister Endy Croes poco poco pero sigur ta dunando atencion na e problemanan aki y ta creando e solucionnan necesario.
Tromp-Lee ta termina bisando cu e ta spera di curason cu pronto Landamento Escolar lo start y cu nos zweminstructeurs lo tin pas laboral. Den mi intersecion como parlamentario semper mi a boga pa cruza brug y topa otro. Como fraccion di parlamento nos lo urgi e diferente partidonan envolvi pa yega na otro dialogando cu solo meta pa un solucion. Tur esaki sigur na beneficio di nos muchanan. Tur esaki sigur na beneficio di nos muchanan.
Parlamentario drs. Shailiny Tromp-Lee (MEP)
