Den e auditorio na Iglesia Piedra Plat 24 di januari ultimo den precencia di Minister di Finansa, Asuntonan Economico y Cultura Xiomara J. Maduro hunto cu algun famianan y e congregacion di Iglesia mes. A onra y reconose Sr. Henriquez como e prome pastor Arubiano Evangelico y escritor di diferente tractadonan y buki na Papiamento.
Lesa e historia y testimonio di e prome Arubiano pastor evangelico na Aruba.
Sr. Bicento Henriquez a nace Juli 19, 1923 (97 aña) na Aruba, un Arubiano “di pura cepa” como su mama, tata, welo, wela, bisa welo/wela tur a nace riba e pida baranca aki! Di chikito el a lanta ta core den e mondinan y cunucunan rond den e barionan di noord, subiendo baranca, bulando di un pa un, anto pia abou! El a cuida carne, cabritonan, y core buriconan den e cunucu di su tata yama “Boneriro” na Nord, unda nan a planta maish’i rabo, pampuna, bonchi largo, patia, melon, etc. El a lanta un cunucero di curason.
Su mama y tata tabata asisti na e Misa di Nord, unda Bicento tambe a asisti y a wordo batisa. Como mucha e tabata asisti den tur e actividadnan religioso manera resamento, siña catasashi, bautismo, y haci rosponde pa pastor.
E no por a sigui cu school despues di seis clas. pasobra e mester a yuda su tata como metsla pa yuda den e gastonan di cria e famia. Pues ta cerca su tata el a siña e trabou ey, te un dia e mes por a lanta su mes cas den e barrio di Kamay. Segun cu el a crece, e tabata masha social y popular den barionan di noord, te cu el a bira parti di un grupo musical y tabata toca guitara den e conhunto e tempo ey, tocando y cantando pa eventonan social. E evento di tur fin di aña cas pa cas cantando “Ay No Be”! pasando rond cu su sombre! E tabata gosa loke e tabata pensa ta bida.
Yong y yen di energia, Bicento a drenta dienst y a sirbi como solda tres aña y ocho luna durante añanan 1942-1945, tempo di Segundo Guera Mundial. Tur e tempo ey e soldanan tabata na estado alerto, ma nunca mester a laga Aruba.
Despues di a sirbi den dienst el a drenta den servisio di Lago Oil & Transport Co. Como aprendis unda el a siña masha hopi y a siña domina e idioma ingles.
Den e temponan ey como hoben di binti dos of binti tres anja el a n’amora di un señorita no mucho leu di su mes cas. Dia 4 di Juni el a uni den matrimonio cu Ursula Tromp, na misa di Nord.
Recien casa el a tende e EVANGELICO na LAGO na pia di trabou. Dor di un testimonio fiel di su mes hefe di trabou. Su hefe tabata lesa Scritura tur merdia sinta na canto di muraya, cu bos audible pa tur esnan sinta ront of cu ta cana pasa bai, por a bin scucha. Bicento a para scucha un dia, y el a para scucha aunke cu un spirito risistante fuerte den principio, ma no a dura mucho tempo cu Bicento su mes a cana di Nord pa Playa pa e cumpra su propio Testament Nobo.
Poco poco el a cuminsa lesa e Palabra di Dios pa su mes. El a wordo convenci cu e ta un pecador bou di condenacion y mester arepenti y kere den e salbacion ofreci na hende cu ta solamente pa medio di Cristo. E mes a hinca rudia na su cas, a admiti, a repenti y a acepta e salbacion ofreci na tur cu kere den e morto y resureccion di Cristo Jesus. Sr. Bicento a laga e bida di paranderia y su bida a cambia completamente.
Sr. Bicento a ser discipula door di mishoneronan di TEAM (The Evangelical Aliance Mission) y a sigui estudionan di homiletica y predicacion.
- Asina tambe Sr. Bicento a desplega como e prome pastor Arubiano Evangelico na Aruba y a pastoria Iglesia Alianza Evangelica for di 1959 pa mas di binti aña.
- Escritor di diferente tractadonan y buki na papiamento manera: BO PREGUNTANAN CONTESTA, PIPITANAN DI ORO y a traduci THE WAY TO GOD by Dwight L. Moody – E CAMINA NA DIOS.
- Sr.Bicento tabata miembro den e prome comite cu a wordo forma pa traha cu e traduccion di e Bijbel completo na Papiamento.
- E prome persona cu a duna noticianan internacional na Papiamento na Radio Victoria.
- E prome pastor nativo radial cu programanan na Radio Victoria, Transmission di e Sirbishi di Adoracion di tur Diadomingo, e progrma E BIJBEL HABRI, BO PREGUNTANAN CONTESTA, E PALABRA, HUBENTUD PA CRISTO.
- Sr. Bicento a forma parti di un di e tres firmantenan di e akte notarial pa lanta stichting Centro Juvenil Washington y asina a forma parti di e prome board di di CJW.
Su prome señora a fayece despues di un matrimonio di 50 aña y ocho yiu y nieto/anan te cu di 4 generacion.
Na December di 1998, el a casa cu Elizabeth Ratzlaff. un Misionera Canades cu a sirbi na e islanan ABC pa cuarenta siete aña. Actualmente nan ta bibando na Huize Maris Stella, Seccion Wanglo, Kamber 43, ya pa cinco aña.
Nan ta gozando di cada dia cu Señor duna nan y ta fiel cu nan debocion y oracion tur mainta tempran. Tambe nan ta lesa corant tur dia y ta altanto di tur loke ta pasando na Aruba y internacionalmente.
Betty ta maneha su laptop y e tin su internet conneccion y e ta comunica cu su hendenan via di email y nan tin un cellular tambe, pero e carchi ta caba hopi lihe y no ta ora tin e manera pa cumpra.
Nan deseo y oracion ta pa caba nan careda aki cu victoria, confiando den Jesu-Cristo cu no ta cambia nunca, ma ta keda semper mescos.
Full e ceremonia aki por ser mira ariba facebook page di #IglesiaPiedraPlat
Fraternalmente,
__________________
Ps. Adriaan O. Berg
Piedra Plat 1-b
Tel.5834631 / 5927794
