Pastor Marcel Balootje – Tata ta cabes di cas , estableci door di Dios, cual ta pone cu e tata mester tin bon relacion cu Dios, pa e ricibi guia pa su Famia.
Tata su posicion no ta discutibel, ni tampoco negociabel, pasobra ora un homber tin un yiu, e ta tata y e mester carga su responsabilidad.
Tata tin autoridad riba su hogar, un autoridad cu no por wordo demostra, cu orguyo, arogancia, violencia, manipulacion, e mester ta un autoridad someti na Dios,y den tur sabiduria y temor di Dios.
Tata no ta solamente ta cria yiu , cumpra paña etc, etc, pero tambe bo tin un responsabilidad spiritual cu bo famia, den cual abo ta presenta cada un di nan dilanti di Dios, y intercede pa tur cos bay bon cu nan.
Tata su responsabilidad ta refleha den Karakter di su yiunan tanto yiu muher como yiu homber.
Tata no tey pa practica duresa di curazon, pero e tey pa siña su yiunan conoce e amor di Dios for di chikito , pa asina tur yiu por sa for di unda e forsa di nan tata ta bini.
Tata ta e prome cu tin cu duna respet na cas, y asina tur yiu mester imita, y sigi locual cu ta bon, y agradabel den bista di Dios.
Tata nunca por ninga su yiu, ni maske kico cu pasa, pasobra dilanti di Dios no ta existi exyiu, yiu ta keda yiu pa semper , locual abo sembra den bo yiu, ta pone cu bo mes lo wordo agrada pa medio di bo yiu.
Tata tin cu haci tur esfuerso pa lanta su yiu den caminda di Señor , door di mustra su yiu cu su testimonio y forma di biba, cu Hesus Cristo ta Señor den su bida.
Tata no por ta descurasha su mes yiu, of stroba, pa yega su proposito de su bida, den tur cos cu ta sano, tata su apoyo mester tey.
Tata no por sera porta di su curazon, ni tampoco porta di cas pa un yiu, cu a bandona cas, pa un motibo di cabesura,of capricho, aunke cuanto e tata a papia cune, pero mester mantene tur dos porta habri pa rescata su yiu for di gara di e enemigo.
Tata su deber ta comunica mas tanto cu ta posibel cu su yiu, y no pensa cu mucha ta hanja experiencia di scol, serca amigo , amiga of internet, pasobra hopi biaha net e cosnan robes nan ta mira y nan ta gusta como mucha.
Tur esaki nos kier recorda tur tata, pasobra nos no ta bibando den e mihor tempo, si abo como tata pone bo responsabilidad un banda , abo y henter bo famia lo lamenta.
No ignora e plan di e enemigo contra bo famia (1 Pedro 5 vers 8).
E amor di tata lo crece tur dia mas , ora e tata ta busca refugio y fortaleza serca Dios y asina crea un berdadero relacion cu Dios.
Sea un tata conciente y responsabel, y lo bo wordo bendiciona pa Dios.
