Ministerio Publico a hiba Anderson Rasmijn corte, como e persona cu a tira Poentje Castro mata. Esey ta loke por compronde di nan anuncio haci na prensa. Pero, ken ta Anderson Rasmijn? y Dicon el’a tira Poentje Castro mata? E mes tabatin un problema cu Poentje? of el’a wordo paga pa mata Poentje? Tin un autor intelectual cu ainda ta bao investigacion? Ministerio Publico no kier a contesta SOLO DI PUEBLO ningun pregunta, pero a bisa cu mester warda te ora cu presenta e caso den corte, unda tur e secretonan lo bira publico.
Anderson Rasmijn a cay cera na aña 2009, dia 20 di Juli. E momento ey el’a pubra di transporta droga pa Hulanda. Su caso a wordo trata na November 2009. Anderson tabata hopi hostina riba e personanan cu a gañe, pasobra nan a bise cu ta un maleta cu droga, pero pa su sorpresa, a bin resulta cu ta dos maleta cu droga. E tabata asina rabia cu el’a basha abao riba e persona cu a deal cune, esta un tal F, yiu di Corsow. Na November 2009, el’a wordo castiga cu 10 luna di prison. Rasmijn mester a recupera su libertad den 2010. Awor e ta vincula den asesinato di Poentje Castro dia 23 December 2010.
Na cas di Poentje Castro, a haya sanger na muraya cu aparenetemente ta di e asesino. Den un sitio poco mas leuw di cura, pafor di cura, a haya algun paña na sanger, entre otro un t-shirt Nike y un jeans. E sospecho cu ambos ta di e asesino. Tur e informacion aki a sali na Hulanda for di un proceso di LOB, unda a manda pidi informacion di e investigacion. Cu otro palabra, Ministerio Publico tabatin e puzzel bon arma y hinca den otro. Nan tabatin paña, y rastro di sanger di e asesino.
Mas cu claro ta un caso cu henter Aruba kier haya sa ta kico a sosode. Poentje Castro tabata un persona amigabel, cu su programa na television y su morto a shock henter Aruba.
