Den Haag – Den su combersacion cu Minister Plenipotenciario tabata tin cu director di Departamento di Enseñansa (DEA) Annemarie Proveyer a papia riba cuater punto di discussion cu na e momento aki ta sumamente importante pa e studiantenan na Hulanda. Esakinan ta guia na e studiantenan, e asunto cu Free Movers, vivienda y seguro di Malesa. Pa loke ta e punto di guia na e studiantenan pa medio di mentornan, sra. Proveyer a bisa cu lo mester pensa den un “estilo nobo” di mentor. E mentor mester ta un “schakel” importante na e studiante. Segun Minister Thijsen un bon guia ta un bon inversion na momento cu Aruba mester di nos hendenan pa bin bek. Loke segun sra. Proveyer tambe ta hunga un rol na e momento aki, ta cu DUO ta ofrece mas ampliacion na e studiante Arubiano cu hopi di nan ta tuma e “startpakket” di
Aruba y despues sigi cu un fiansa di DUO, sin nesesariamente keda cu un “Arubalening”. Esaki ta trece cune tambe cu e studiante ta bai for di bista di instancianan na Aruba, manera Arubahuis y DEA.
Minister Thijsen a bisa cu di ta contento pa tende cu Aruba ta trahando riba un plan integral kico ta e demanda riba e mercado laboral. Sra. Proveyer a bisa esaki ta hinca den Plataforma Enseñansa y Labor (PEL), unda diferente partnernan social ta envolvi.
Pa loke ta e situacion y visibilidad riba e grupo di Free Movers, cu ta studiantenan cu ta bin sin un “Arubalening” Hulanda, sra. Proveyer ta di acuerdo cu Minister Thijsen cu pa e grupo aki tambe lo mester bin un forma di guia. Mayoria di nan ta sigi un estudio riba nivel di MBO.
E asunto rond di vivienda pa studiante a keda papia, unda un biaha mas Minister Thijsen a bisa cu esaki ta un punto cu semper e ta trece dilanti ora cu e bishita y papia cu burgemeesternan. Pero e problema ta conta pa henter Hulanda, un ciudad mas grandi cu e otro. Minister Thijsen a bisa cu e ta papiando cu minister di Enseñansa Endy Croes pa mira cual solucionnan por bin cune.
E punto riba seguro medico pa e studiantenan, ta algo cu recientemente a keda regla, unda studiantenan Arubiano por bai den e asina yama “basisverzekering” di Hulanda. Antes e ley riba seguro medico obligatorio di Hulanda, tabata exclui studiantenan Arubiano pa motibo cu nan tabata wordo catagorisa como personanan cu ta na Hulanda pa studia, dus temporal. Studiantenan Arubiano mester a tuma un seguro medico internacional. E Nationale Ombudsman di Hulanda Reinier van Zutphen a traha un rapport critico riba e asunto aki y esey a conduci cu Gobierno di Hulanda a cambia e ley. Annemarie Proveyer a bisa cu awor e studiante Arubiano tin diferente opcion pa cu seguro medico cu sigur ta positivo.
