Diaranson anochi den stadion nacional di Jamaica, selekshon di Kòrsou a logra klasifiká pa promé biaha den historia pa un Mundial. Esaki a yega despues ku nan a logra un empate na 0-0 kontra Jamaica. Stadion tabata yen ku 35 mil hamaikano, pero tambe tabatin mas ku 200 hincha di Kòrsou ku a duna anima durante henter e wega.
Den promé mitar, Kòrsou a tin un bon chens, pero lamentablemente esei no a bira gol. Jamaica tambe a krea algun oportunidat; un promé mitar bastante balanseá. E dos ekiponan a bai rest den un 0-0.
Na di dos mitar Jamaica a tuma kontrol di e wega, miéntras Kòrsou tabata hunga mas na kontraatak. Eloy Room a trese hopi salbashon, i na algun momentu bal a dal den palu tambe. Jeremy Antonisse a mete bal na e 72 minüt, pero e gol a anulá pa motibu di posishon adelantá (offside).
Rond di 80 minüt, Kòrsou a kuminsá defendé e empate ku hopi esfuerso, ora Juriën Gaari a drenta den lugá di Jürgen Locadia. Nervio di tur hincha a subi ora na 90+6 minüt e rèfri a fluit pa un pinalti kontra Kòrsou riba un supueso falta di Antonisse. Pero despues di revisá VAR, e pinalti a anulá.
Poko despues rèfri a fluit pa final di e wega—i historia a krea. Kòrsou pa promé biaha ta klasifiká pa un Mundial, huntu ku e titulo di pais mas chikí ku a logra esaki. Un aktuashon verdaderamente tremendo.
Varios hungadó tabata sobresalí den e wega: Eloy Room, Shurandy Sambo, Armando Obispo, Livano Comenencia, i Leandro Bacuna, tur ku un gran trabou pa tene e portería limpi.
Awor Kòrsou ta warda sorteo pa Mundial 2026, ku lo tuma lugá na Washington dia 5 di desèmber. E selekshon di Kòrsou a laga un stamp histórico: no so klasifiká, pero a hasi esaki invikto: for di 10 wega nan a gana 7 biaha i a empate 3.
