Ora cu un ciudadano pidi un decision di un organo administrativo (hopi biaha e Minister), por ehempel, un permiso pa sirbi bebida alcoholico den un restaurant local, tin un procedura standard pa e organo administrativo por yega na un decision. E decision riba e peticion di e ciudadano ta yama ‘beschikking’. Si un ciudadano no ta di acuerdo cu e decision, por ehempel, pasobra a nenga e permiso of e ciudadano no a haya contesta di e organo administrativo, e ciudadano por haci un obhecion na e mesun organo administrativo. E organo administrativo mester reconsidera e decision anterior completamente. Un Bezwaaradviescommissie ta un comision independiente cu ta conseha un organo administrativo riba e asunto aki. Aunke e sistema di ley administrativo na Aruba pa gran parti ta parecido na e sistema di Hulanda, e Bezwaaradviescommissie ta structura diferente, debi na e escala chikito di Aruba. Na aña 1993, e idea tabata pa reduci e carga di trabou di e instancianan administrativo di Aruba, incluyendo e huesnan, door di establece un Bezwaaradviescommissie obligatorio, cu lo conseha independiente y cu experticio tocante tur obhecion.
Sinembargo e autornan tin duda tocante e bon funcionamento di e Bezwaaradviescommissie Arubano den e procedemento di proteccion huridico. Den practica, e cantidad di caso ta aumenta y regularmente e procedemento di obhecion tabata resulta den un fictieve weigering of negacion ficticio (un decision negativo automatico, sin repaso substancial door di e organo administrativo). Ta conclui esaki a base di e decisionnan di corte, e cifranan di e cantidad creciente di caso di derecho administrativo sin un decision tocante e obhecion, y e falta di varios organo administrativo pa pasa e obhecionnan na e Bezwaaradviescommissie na tempo. E Bezwaaradviescommissie mes tampoco ta trata e obhecionnan den di e terminonan fiha, pa motibo di falta di trahador y recurso financiero. Esaki ta resulta den un aumento di trabou pa corte administrativo y un proceso huridico mas largo pa e interesado, loke ta pone presion riba e proteccion huridico di ciudadano.
Pa proteha derechonan di ciudadano mester provee e Bezwaaradviescommissie cu recurso y personal apropia, of e comision por ta envolvi facultativamente den e procedemento di obheccion (manera ta e caso den otro parti Caribense di Reino). Un modificacion di e Landsverordening di Administratieve Rechtspraak lo ta
necesario, aunke por scoge un trayecto cu ta cuadra miho cu e situacion.
Prome cu por dicidi tocante un modificacion, e autornan ta recomenda
realisa mas estudio comparativo tocante e funcionamento di
Bezwaaradviescommissies na otro pais di Reino prome.
