Diahuebs mainta, e homber M. a presenta den Corte pa e caso penal cu Ministerio Publico a cuminsa contra dje. M. ta wordo acusa cu riba 21 Juli 2024, el a viola e dama Z.
SOLO DI PUEBLO por a compronde cu Hues a reclama na Fiscal cu e ta haya cu e investigacion no ta completo. Hues a pospone e caso y a ordena Fiscal pa ordena Polis haci mas investigacion.
PETICION PA TESTIGO
Ta asina cu Fiscal a acusa M. di a viola e dama Z. riba 21 Juli 2024. Despues di e acusacion, abogado mr. Ras a haci peticion na Hues pa scucha un testigo, e homber L.
E abogado a bisa Hues cu L. ta un amigo di M. y L. tabata hunto cu M. rato promer cu M. a bay den auto cu e dama Z.
FISCAL A NENGA PETICION
Fiscal a reacciona na Hues cu e ta haya cu e testigo no ta relevante. Na opinion di Fiscal, e testigo no por bisa nada di ora cu e violacion a tuma lugar.
HUES A RECLAMA INVESTIGACION
Hues a bisa cu el a studia e caso y ta haya cu e investigacion no ta completo.
El a mustra cu aki ta trata di un acusacion serio. Hues a mustra cu Polis ta bisa cu tin un homber H. cu ta bisiña di e victima, e dama Z., a bisa cu Z. a mand’e mensahe kico a sosode cun’e. Hues a remarca cu Polis no a bay interoga H. riba esaki.
Hues a mustra tambe cu M. a bisa den Corte cu ora el a tende cu e dama Z. a haci denuncia di violacion contra dje, el a yama Z. Hues ta haya cu e investigacion no ta completo.
POSPONE CASO
Hues a ordena Fiscal pa ordena Polis pa scucha e homber H. pa sa kico e dama Z. a papia cun’e riba whatsapp. Tambe Hues ta haya importante pa sa kico e sospechoso M. a papia cu e dama Z., despues cu Z. a haci denuncia.
Hues a sigui bisa cu lo ta bon pa Polis papia cu e homber L. Hues a bisa cu e kier procesverbaal di Polis riba tur esakinan.
Hues a pospone e caso y a bisa cu ora e procesverbaal ta cla, lo fiha un fecha pa tratamento di e caso.
