E team di defensa di Mike de Meza no ta contento cu e decision di Hues. Nan a duna di conoce cu nan lo apela e sentencia.
SOLO DI PUEBLO por a compronde cu e team di defensa di Mike de Meza, a duna di conoce cu lo apela e sentencia pasobra nan ta haya cu un biaha mas, Corte ta pone e derecho humano di Mike de Meza un banda.
E team di defensa di Mike de Meza a manda un comunicado caminda nan ta mustra cu a cuminsa un caso sumario contra Ministerio Publico pa entre otro haya claridad riba e acusacionnan contra Mike de Meza y pa Corte ordena Ministerio Publico pa duna e caso e importancia y e prioridad cu, mirando e circumstancia y e interes general, cu e ta merece.
A PONE DERECHO DI MIKE DE MEZA UN BANDA
E team di defensa no ta di acuerdo cu e decision di Corte, caminda Hues a bisa cu door di un caso similar a wordo declara no admisibel, awor aki Mike de Meza no tin ningun interes di urgencia mas pa haya un decision riba su peticion.
E team di defensa ta haya e decision di Hues incomprendibel door cu e demanda, no a wordo trata a base di su contenido. Ademas e preguntanan legal no a wordo contesta debidamente.
E team di defensa ta haya cu no por bisa cu tin un proceso husto (behoorlijke strafrechtbedeling).
Na opinion di e team di defensa, un biaha mas e derechonan, manera ancra den tratadonan internacional di derecho humano di Mike de Meza y e interes general a wordo hala un banda.
LO BOLBE APELA SENTENCIA
E team di defensa ta duna di conoci cu logicamente lo apela e decision incomprendibel aki na Hof di Corte Superior. E team di defensa a bolbe expresa cu si mester, lo hiba e caso dilanti Corte Europeo.
