Liesje Khemlani no ta un persona desconoci den mundo di politica na Aruba. E señora tin 30 aña trahando na Parlamento y ta un persona cu conocimiento di ley y proceduranan di parlamento. Segun nos por compronde e ta traha den departamento di griffie y archief, o sea e ta file y warda tur documento di parlamento y naturalmente pe por file cada documento na nan lugar, e ta haya tur carta pa lesa.
Pa esun cu conoce Liesje sa tambe cu Liesje ta un siguidor di politica y sa di tur acontesimiento rond di politica.
Algo a sosode, algo lo no a cana bon, unda cu a bin sali na cla cu tin cierto conflicto entre trabao y politica. Kico precisamente? Ningun hende sa.
Sinembargo no ta prome ves cu tin documentonan di parlamento, cu diripiente bo por haya un of otro parlamentario ta zwaai cu nan den man.
Hopi hende lo lanta un wenkbrauw y keda straña ta con bin un documento cu ta di parlamento, por a yega den man di otro politico.
Mester remarca cu no tin ningun infomacion ta na kico e carta di Promer Minister lo ta referi na dje. Sinembargo awor e topico a cambia pa Liesje, unda cu tur partido opositor ta cuminza cuestiona cu esaki ta censura y dictadura y kier usa e sucedido como un otro wega politico pa ataca Gobierno.
Kico Liesje a haci, no a haci, bao protest of no, ta bay un signal si pa tur otro empleado publico, pa recorda nan riba nan obligacion di trabao. Respeta bo trabao y no laga bo mes wordo usa den wega politico, pasobra e consequencia por ta wardabo ey mes na skina.
Na Liesje nos ta dese’e forsa den e momentonan poco dificil aki y cu tur cos lo esclarac’e.
