Ora Dios ta yama un persona pa sirbi Dios,
Dios ta hacie manera E kier y unda cu E kier.
Pa Dios usa Moises como e persona, e gran lider cu lo saca e pueblo di Israel for di Egypto, Dios a cuminsa na prome lugar saca Moises, como criminal for di Egypto, na un forma cu e no por a bolbe bek, despues pasa Moises 40 anja den desierto, y despues Dios a yame y dune instruccion pa bay saca e pueblo, y den tur obediencia Moises a logra, y manera Bijbel mes ta splica nos y nos tur por lesa cu e ministerio di Moises no tabata facil pasobra e pueblo tabata hopi rebelde y murmurador.
Ora Dios ta yama un persona pa sirbi Dios den un ministerio tin cosnan cu mester tene cuenta cune y e cosnan aki ningun ta secreto:
No busca aprobacion di hende: Pasobra ta fabor di hende mi ta busca awor, of di Dios? Of ta hende mi ta trata di agrada? Si ainda ta hende mi ta trata di agrada, lo mi no tabata un sirbido di Dios.( Galationan 1: 10).
Ningun hende no ta ricibi yamada for di hende, pero directamente for di Dios, un no ta hende ta bay bisa bo kico bo ta bira, ta Dios ta demostra atravez di Su Spirito Santo cual ta bo yamada,y Dios ta yama hende pa medio di Su gracia. ( Galationan 1:11-24).
Hopi biaha Dios ta yama hende, pero nan kier keda pega na cosnan secular, y no kier tende na e yamada di Dios, pero nan ta lubida cu esun cu Dios yama, Dios ta cuida y Dios ta prepara.
Den preparacion di Dios pa un hende su yamada, Dios lo pase den tur sorto di prueba y hacie obediente pa e por para keto y wordo uza door di Dios, den e locual Dios kier pa e wordo uza.
No ta importa si bo ta rico, of bo tin bon posicion, ora Dios tin mester di bo e saca bo for di caminda bo ta haci bo humilde pa bo fit den e ministerio den cual e a yama bo, por ta bo tin cu perde amistad, por ta e ta manda bo den otro pais, pero caminda tin yamada mester tin obediencia completo na Dios.
Den Hebreonan 5:7-10 ta para scirbi lo siguiente di nos Senjor Hesus Cristo:
Tempo cu E tabata den carni, E tabata ofrece oracion y suplica cu gran sclamacion y lagrima na Esun cu ta capas di salb’E for di morto.
E a wordo tendi pa motibo di Su piedad.
Aunke e tabata Yiu, e a sinja obedencia door di cosnan cu E a sufri.
Y despues di a wordo haci perfecto, E a bira pa tur esnan cu a obedec’E e autor di salbacion eterno. Siendo yama pa Dios segun e orden di Melkisedek.
Si Hesus mes mester a pasa den pruebanan ( Mateo 4;1-11, kico ta para pa nos awendia, pasobra Dios Su yamada ta fuerte, y una vez nos ta den nos tin di keda, aden, ningun caminda no ta para scirbi, cu Dios ta permiti nos bay mete den cosnan cu for di su boluntad y despues bini bek.
Saulo di Tarso tabata un persigido di e iglesia di Dios, pasobra e tabata biba den Judaismo, pero nos tur sa con Dios a yame di un forma fuerte ora e tabata riba caminda pa Damasco.( Hechonan 9:1-6).
Locual Dios a haci cu Saulo di Tarso E ta capas di hacie awendia tambe.
Sinceramente, Pastor Marcel Balootje
