EcoGas a organisa un tayer riba e bentaha cu gas tin awendia como fuente di energia den industria. Mas y mas compania ta cambiando e uzo di combustibel pa gas. No solamente pasobra e ta mas economico, sino cu e ta trece un sin fin di bentaha den promove un miho funcionamento di aparatonan. Entre e invitadonan cu a participa activamente durante e tayer tabata Dienst Technische Inspectie (D.T.I) y Cuerpo di Bombero di Aruba.

EcoGas a invita Jose Morales, un consultant internacional di e compania Admiral LPG. E ta yuda EcoGas den ehecucion di proyectonan grandi. E ta un miembro di directiva di National Fire Protection Association (NFPA) di Merca. Cada tres aña nan ta actualisa e normanan di NFPA. Esaki ta e normanan cu tin di sigui ora di instalacion di gas LPG, tanto industrial, comercial, pa cas of tur otro caminda. Como miembro di directiva di NFPA, Morales ta asisti den crea e normanan nobo y como tal a bira un experto riba e tema, capas pa brinda guia na tur otro cu ta aplica e normanan aki den nan trabou diario.

Durante e tayer, a repasa tur e puntonan ey, pues un refreshment pa tur cu ta aplica e normanan aki den nan trabou. Tabata un grupo di mas o menos 30 participante, procedente di varios compania, hotelnan, tecniconan cu ta maneha edificionan grandi, instaladonan di gas, etc.

Na momento di e presentacion, a elabora riba e principio basico y temanan di siguridad. Jose Morales di Admiral LPG a expresa cu e normanan actualisa ta masha importante den e industria. No solamente na nivel di operacion di un compania, pero nivel di consumidor y residencial cu ta e cosnan hopi importante cu no ta impacta solamente e luga di trabou pero tambe den nos cas.

Liquefied Petroleum Gas (LPG) ta gas den forma likido y ta conoci aki como gas propano , cual ta uza pa cushina, uza den industria, hotel, restaurant. Tambe ta uz’e pa keinta awa, cuminda, seca paña. E gas aki ta pa uzo domestico entre otro ora di haci BBQ.

Pedro Werleman, hefe di seccion di prevencion di brandweer, a indica cu e informacion tabata hopi bon. A trece mas conocemento p’e personal di brandweer y asina nan por traha miho cu tur partner cu tin di haber cu LPG. Diesel ta bay keda un banda y Werleman ta kere cu gasolin tambe ta bay ta menos uza. E ta kere cu e futuro lo ta LPG. Pa loke ta siguridad, tur informacion ricibi y awo nan ta miho informa. Awo nan sa con pa handle cu ne tambe.

George de Nobrega di EcoGas Aruba a bisa na final cu nan a haya bon feedback y tur participante a sali contento di loke nan a tende y di loke nan a siña. Nan kier haya presentacion pa por sigui y pasa esaki na nan coleganan. E training aki tabata hopi positivo.

Tocante EcoGas
EcoGas a bira un realidad den aña 2018. Nan ta situa riba un tereno banda di ATCO Concrete na Barcadera. Meta di e compania nobo aki ta pa maneha gas comercial pa restaurantnan, hotel, laundry y tur otro negoshi cu ta rekeri gas pa nan por opera. Claro cu e compania ta percura pa mas cupo di trabou. EcoGas ta un subsidiario di MetaCorp, e unico compania netamente Arubiano cu ta existi pa 100 aña continuo y cu ta sigui inverti, innova y desaroya riba nos isla.

LEAVE A REPLY

Please enter your comment!
Please enter your name here