Diamars mainta a tuma lugar varios inval unda tambe a inval cas di Eddie Briesen, ex minister di MEP. Informacion cu nos redaccion a ricibi ta bisa cu Eddie no ta sospechoso den caso Kwihi. E inval na su cas no ta relaciona cu su persona, sino cu otro persona cu ta habita su cas of apartamento. Esaki ta trece un buelta den e promer noticia cu a sali, unda cierto medionan di comunicacion erroneamente a bay mucho liher na ataka y fulmina contra ex minister Briesen.
Caso Kwihi ta bay riba ex minister Chris Romero cu su man drechi Eumar Koolman. Ta investigando contracto y servicio. Aparentemente lo tin cosnan cu no a cana manera debe ser y awor lo mester wordo investiga pa haya aclariacion. Ministerio Publico no a divulga ta ki sorto di contract ni pa kende ni pa cual servicio.
Ta ser bisa cu un begrotingscordinator di ex minister Romero tambe a wordo bishita y hunto cu otro personanan mas.
A bishita tambe e oficina di corant Awe Mainta, cual corant a wordo cumpra pa Eumar Koolman, pero Ministerio Publico a bisa cu e bishita no tin nada di haci cu e negoshi. E ora ey nos mester compronde cu nan lo a bay bishita e oficina di Eumar Koolman na Awe Mainta enbusca di documento y data.
