Parlamentario Eduard Pieters di fraccion PPA a presenta un mocion fuerte durante reunion publico di diahuebs tocante situacion di cuido di adulto mayor na Aruba. E mocion tabata presenta cu argumento solido y a haya aprobacion tambe di henter cuerpo di Parlamento.
Esey kiermen cu Parlamento a manda un mensahe cla pa gobierno: situacion di cuido di nos grandinan no ta sostenibel mas y mester accion structural inmediato. Awor responsabilidad ta na minister.
Un Rapport cu no por ignora
Base di e mocion tabata e rapport di Inspectie Volksgezondheid Aruba (IVA), titula “Als zorg levens kost”. “E rapport aki a mustra claramente e deficiencianan serio den e centronan di cuido: caida, infeccion, negligencia y hasta consecuencia fatal. Inspectoria a indica cu hopi incidente no ta casualidad, pero resultado di problema structural, manera: falta di personal, falta di experticio, gobernacion deficiente (“bad governance”) y maneho reactivo en bes di sistematico. Inspectoria mes a pidi un enfoke sistematico di maneho, no solamente intervencion, ora un problema presenta,” Eduard a señala. Esaki no ta un simpel recomendacion, sino un alarma.
Presion riba sistema no ta sostenibel
Pa fraccion di PPA, e mocion aki ta reconoce cu presion riba e casnan di cuido actualmente no ta sostenibel mas. Siguridad y dignidad di e cliente mas vulnerabel ta bou riesgo. P’esey e mocion aki no ta pidi mas estudio, sino ta pidi deadline concreto:
- Den maximo 2 luna: finalisa y presenta un maneho nacional pa cuido di adulto mayor na Parlamento;
- Den 3 luna: ehecuta e normanan di calidad pa garantisa seguridad den casnan di cuido;
- Den 3 luna: presenta un plan di ehecucion cu meta, e actividadnan y e indicadornan midibel;
- Den prome presupuesto supletorio 2026: aloca e fondonan necesario pa ehecuta e plan.
Esaki no ta sugerencia, sino un mandato parlamentario.
Di plan bunita na resultado real
Loke ta haci e mocion aki fuerte ta su enfasis riba implementacion. Segun Pieters: “No solamente vision, pero plan cu midimento. No solamente palabra, pero presupuesto. Durante aña, cuido di adulto mayor a wordo discuti den termino di plan futuro, grupo di trabou y estudio adicional. Pero realidad ta cu; vergrijzing a sigui crece, lista di espera a sigui crece, presion financiero a aumenta y e famianan ta perde confianza”.
“E mocion ta reconoce cu un enfoke integral ta sumamente necesario: mehora calidad den e casnan di cuido y fortalece apoyo pa esunnan cu ta biba na cas. Vision tin balor, pero sin ehecucion, vision ta keda solamente riba papel,” Eduard a enfatisa.
Un test di responsabilidad politico
Awor cu a aproba e mocion unanimamente den Parlamento, e preguntanan crucial ta:
- Minister Wyatt Ras lo respeta e deadline?
- Lo tin e fondonan real aloca?
- Lo bin cu un plan di ehecucion cu tin resultado midibel?
Cuido di adulto mayor ta toca tur famia na Aruba. No ta solamente algun cifra preocupante, ta nos mama, nos tata, nos wela, nos welo.
Finalmente parlamentario Pieters ta gradici su coleganan parlamentario, cu a pone tur color politico un banda y a aproba e mocion aki cu ta pa bienestar di Aruba completo. Parlamento a papia cla: basta cu pospone decision. Fraccion PPA a tuma su responsabilidad. Awor ta momento pa ehecuta, pasobra nos grandinan mester y merece un cuido cu ta protega nan bida.
