Eduard Pieters di partido PPA durante conferencia di prensa a informa cu ora ta bishitando cas por mira con hopi di nos ciudadanonan ta confronta retonan di salud mental.
Papiando cu e personanan aki nan ta bisa cu nan tin miedo di bin dilanti, mientras cu otronan ta bisa cu nan ta bay na instancianan cu ta brinda e atencion necesario, pero nan tin cu warda algun luna prome cu nan haya e atencion.
PPA den su programa di partido no solamente ta trece e retonan cu comunidad ta confronta, pero tambe ta bin cu e solucionnan cu lo cuminsa wordo implementa despues di dia 6 di december. Un di e puntonan cardinal ta cu mester amplia e opcionnan di cuido di salud mental na Aruba. Esaki pasobra awo ta haya algun instancia cu ta brinda e servicio y nan tin un lista di espera. Ampliacion di e opcionnan pa cuido di salud mental ta significa cu den e pakete basico di AZV por tambe brinda comunidad e oportunidad pa haci uzo di e AZV pa haya e servicio di salud mental.
Acualmente, un ciudadano cu no ta un ambtenaar no ta haya cuido di salud mental cubri door di AZV. Mester bisa si cu e ambtenaarnan ta haya parti di cuido di salud mental cubri cu nan AZV+, pero no total, parti di dje nan mes mester cubri.
Eduard Pieters ta bisa cu banda di esaki, pa un forma preventivo y pa yuda carga e peso den aspecto di salud mental, PPA cu su programa kier incentiva companianan cu tin cuido mental na pecho. Es decir, cu nan tin e parti aki hinca den e pakete laboral di cada empleado. E pakete aki ta encera parti di psico-educacion, esta educa e empleadonan pa determina ki ora nan por ta bayendo den direccion di depresion of no por auto-regula nan emocionnan. Asina por evita di yega asina leu cu consencuencianan no desea. Tambe tin e parti curativo, esta ora un empleado bati na porta, cu e por haya e ayudo y e atencion debido.
Na momento cu dunadornan di trabou ofrece e tipo di pakete asina, e lo por haya empleadonan mas contento, mas motiva y naturalmente e lo bay duna un miho prestacion na trabou.
Pa loke ta e dunadornan di cuido di salud mental, tambe lo bin cu incentivonan pa nan por sigui profesionalisa, bin cu programanan mas contextualisa pa esnan den e ramo aki por yuda ciudadanonan, e ora nan lo por haci un apelacion pa sigui e programanan aki y PPA den gobierno lo para nan tras y brinda e oportunidad aki.
Consecuencia di e cambionan y incentivonan aki ta cu lo yuda baha e lista di espera no solamente pa e adultonan, pero tambe pa e muchanan cu kisas no ta yega na remarke asina lihe pa haya un diagnostico.
