Diabierna pasa, parlamentario Eduard Pieters di fraccion di PPA, tabata presente na e evento di Parlamento Hubenil den cuadro di Dia Internacional di Derecho di Mucha, cu ta un dia mundial unda ta enfatisa proteccion, igualdad y desaroyo di tur mucha. E fecha tin un peso historico: den 1989 Nacion Uni a ratifica e Convencion di Derecho di Mucha y for di 1990 e derecho fundamentalnan aki a keda reconoci mundialmente como base pa bienestar y futuro di cada mucha y hoben.
Derecho di Igualdad y Enseñansa apropia
Durante e encuentro, Eduard Pieters a pone enfasis riba dos derecho cu ta fundamental y cu ta profundamente conecta cu e labor di Eduard Pieters:
- Derecho pa trato igual – Ningun mucha no por wordo discrimina riba idioma, rasa, religion of origen. Igualdad no ta un luho; el ta un derecho.
- Derecho pa educacion apropia – Cada mucha mester haya enseñansa digno, accesibel y adapta na su realidad linguistico y social.
Segun Pieters, derecho pa educacion y trato igual ta forma e base pa un comunidad husto y pa cria un generacion cu por crece den dignidad. “E derecho pa educacion apropia ta hopi cerca di mi curason,” el a bisa durante e evento.
Parlamento Hubenil ta mas cu djis politica
Fraccion di PPA ta expresa gran apreciacion pa e trabou cu Parlamento Hubenil ta realisa. E invitacion pa participa den e actividad di diabierna no tabata solamente algo simbolico. Esaki tabata un recordatorio di e rol sagrado cu Parlamento Hubenil tin den forma un pueblo.
Parlamento Hubenil no ta simplemente un proyecto politico; e ta un plataforma pa: desaroya pensamento critico, fortalece liderasgo hubenil, siña tocante civismo y responsabilidad y practica un cultura di participacion activo den bo comunidad.
PPA ta compromete pa sigui sostene e programanan y motiva mas hoben pa tuma parti den e workshopnan, como tambe e simannan di formacion y e sesionnan educativo cu Parlamento Hubenil ta brinda.
Reflexion nacional dia 20 di november
Den henter e siman aki, varios fundacion y instancia lo haci actividad relaciona cu 20 di november pa conmemora Derecho di Mucha. Esaki ta un momento pa mira nos mes den e spiel: Con Aruba ta trata nos muchanan? Con nos ta protega nan? Nos ta scucha nan?
Eduard Pieters a manda un mensahe poderoso pa e hobennan presente:
“No sucumbi pa presion di hende grandi si loke nan kier di bo ta contra loke ta husto. Sinti bo fuerte. Papia cla. Defende bo derecho.”
Y e mensahe cu Eduard Pieters ta manda pa nos adultonan ta, cu e responsabilidad ta mes grandi. “Cada adulto mester conoce e 10 derechonan fundamental di mucha, como adulto nos mester empodera nos yiunan pa nan sa cu nan bos tin balor, percura pa crea un ambiente cu yiu por crece sin miedo y lucha contra corrupcion, e abusonan di poder y nepotismo pa duna nan un futuro limpi,”
Finalmente Eduard Pieters kier enfatisa cu nos como adulto y mayor mester percura pa protega nos mucha- y hobennan di Aruba. Fraccion di PPA ta reafirma su compromiso pa sigui defende nos hobennan, sigui scucha nan bos y sigui traha pa un pais unda tur yiu por crece cu dignidad y igualdad. Nos hobennan ta futuro di nos pais. Nos obligacion ta pa guia, protega y duna nan espacio pa desaroya y briya optimalmente.
Diabierna ultimo fraccion di PPA tabata presente na e evento di Parlamento Hubenil en conexion cu Dia Internacional di Derecho di Mucha proximo
Ta bay bek den tempo, raticifica na 1989 y a cuminsa 1990 a cuminsa via un comision prncipio fundamental a yega na derecho di mucha. Fraccion di PPA kier pone atencion na dos derecho fundamental y cu ta cerca na curason di e parlamentario Eduard Pieters, esta cu tur mucha tin derecho pa haya trato igual, pues no ta descrimina un mucha pa e idioma cu e ta papia, rasa of religion. Y tambe bo ta haya derecho pa haya enseñansa y na forma apropia, cu ta hopi cerca di mi curason.
Fraccion di PPA ta hopi contento cu e trabounan cu Parlamento Hubenil ta haci y cu nan a invita nos riba e dia aki, unda nos a combersa cu nan tambe y nos kier sigui motiva y encurasha nos hobennan, pa nan participa y bay workshop y bay e programaman di Parlamento Hubenil. Ta bon pa enfatisa, cu Parlamento Hubenil no ta solamente enfoca riba e parti politico, pero tambe ta concentra riba formacion di un nacion. PH tin un rol hopi Sagrado y fundamental y fraccion di PPA sigur ta sostene nan den tur loke nan ta haci cu e hobennan.
Dia 20 di november lo tin mas actividad na Aruba, den cuadro di Derecho di Mucha y ta algo pa nos reflexional y wak con Aruba ta tratando nos muchanan y nos hobennan. E hobennan mester sigui persevera y no sucumbi pa loke hende grandi kier bisa bo, si den e sentido cu ta algo malo, abo para pa bo mes y no tene miedo pa vocifera loke bo ta pensa. P’esey ta importante pa nos mucha- y hobennan sa nan derechonan. E mensahe pa nos adultonan ta, pa nan sa e 10 derechonan di mucha cu ta e principionan fundamental pa nan desaroyo y pa nos respeta esey. Logicamente como mayor y adulto, nos mester sa con pa empodera nos mucha y hobennan pa nan no tin miedo, kere den nan potencial ta hopi importante pa nos lanta un sociedad cu ta kere den su mes, cu ta bringa corupcion y nepotismo.
