Den un momento global, caminda inseguridad alimentario ta bira cada bes mas un realidad, parlamentario Eduard Pieters di fraccion di PPA ta pone enfasis riba un punto crucial: Aruba mester fortalece su produccion local como prioridad nacional, no como opcion.
Durante su bishita reciente como consumidor na Mercado di Santa Rosa, unda nos productornan local ta reuni cu nan berdura fresco, manera; lechuga, bonchi y otro producto di calidad, pero tambe webo y carni fresco di calidad, Pieters a topa cu un realidad inspirador, pero tambe preocupante. E potencial t’ey, pero e retonan ta igual di real. “Mi ta contento di a combersa cu e productornan na Santa Rosa,” Pieters a expresa. “Nan ta produci calidad, pero nan ta enfrenta obstaculo cu mester solucion urgente.”
Awa: e mayor obstaculo
Un di e desafio principal cu e productornan a trece dilanti ta acceso na awa. Sin awa accesibel y confiabel, produccion no por crece. Pieters ta pone un punto strategico: Aruba tin recurso, pero no ta uza nan optimal. “Nos tin AWSS, pero nos mester wak con e awanan procesa por wordo re-uza como awa limpi pa agricultura,” el a indica. Re-uzo di awa pa plantacion, mata y bestia por bira un solucion duradero pa sostenibilidad di produccion local.
Reto natural y humano: cacho, yuwana, lagadishi y malesa
E cunukeronan tambe a expresa cu nan ta enfrentando problema constante cu yuwana, lagadishi y e malesanan cu biento ta trece. Esnan cu tin cria ta confronta cachonan di hendenan iresponsabel cu ta laga nan cana los y nan ta drenta y mata nan bestianan. Esakinan ta algun ehempel cu ta afecta produccion diario y ta mustra falta di un maneho integral y moderno. “Nos mester scucha e productornan, pa por crea solucion practico y eficiente ya cu nan ta hopi importante pa seguridad alimentario pa nos pais,” Pieters a enfatisa.
Tecnologia y tradicion mester bay hunto
Aruba no tin hopi tera pa produccion masivo. Esaki ta pidi pa innovacion:
- Vertical farming
- Uzo eficiente di espacio
- Integracion di tecnologia den agricultura
“Nos mester combina tecnologia cu plantacion tradicional pa atende reto di futuro,” Pieters a bisa.
Dependencia di importacion ta un riesgo
E punto mas critico ta dependencia di Aruba riba importacion. Awe, mas di 90% di nos alimento ta importa. Den un mundo cu situacion geopolitico ta cambia rapido, esaki ta un riesgo real.
“Nos no por sigui asina. Nos mester baha dependencia pa 60-70%,” Pieters a declara.
Produccion local ta directamente conecta cu seguridad nacional y resiliencia economico.
Gobierno mester actua
Pieters a confirma cu e lo sigui dialogo cu asociacion di cunukero pa profundisa riba e tema. Pero e mensahe principal ta cla:
Gobierno mester pasa di palabra pa accion.
- Mehora mas ainda facilitacion pa acceso na awa.
- Proteha produccion contra plaga.
- Atende cu e hendenan iresponsabel cu ta neglisha y laga cachonan los.
- Stimula innovacion contextualisa.
- Crea maneho sostenibel.
Sin accion concreto, potencial local lo keda limita.
E tempo pa actua ta awor
Segun Pieters, Aruba tin productor dedica, cu tin conocemento y potencial. Loke falta ta liderazgo y decision politico. “Produccion local mester bira un prioridad real,” Pieters a conclui. “Paso un pais cu no por alimenta su mes, ta un pais cu ta hopi vulnerabel.” Den un mundo incierto, Aruba no por sigui depende di otro. E futuro di nos seguridad alimentario ta cuminsa cu y na Santa Rosa pa sostene nos productornan local y mester continua cu accion concreto awe.
