Durante e reunion parlamentario, unda SERLIMAR a presenta su plan strategico, parlamentario Eduard Pieters di fraccion di PPA a trece un mensahe fuerte y directo: “E crisis di sushi na Aruba no ta solamente un problema tecnico of logistico, pero principalmente un problema di falta di handhaving, falta di responsabilidad y falta di liderazgo politico”.
Segun e cifranan presenta door di SERLIMAR, e compania estatal ta cubri entre 80% pa 90% di e recogemento di sushi domestico na Aruba. Pero a pesar di esey, realidad ta cu Aruba ta mas sushi cu nunca. “Nos no por sigui laga Aruba bira un pais, unda sushi ta domina caya, mondi y cura di hende,” Pieters a enfatisa.
Un sistema structural cu ta ehecuta regla
Un di e puntonan mas critico cu Pieters a pone riba mesa tabata e situacion actual, unda SERLIMAR lo por (despues di basta intento) yega na e punto di kita bari di e personanan cu no a paga nan contribucion. Segun Pieters, esaki ta crea un problema hopi mas grandi. “E pregunta cardinal ta: ora bo kita bari di sushi na un cas, unda nan ta tira nan sushi e ora?” el a cuestiona.
Pa fraccion di PPA, e contesta ta visibel den tur bario, den mondi, den cura di hende y riba tereno bandona. Esey ta contribui directamente na e problema di sushi ilegal cu Aruba ta enfrentando awor.
SERLIMAR no por carga e peso su so
Pieters a indica cu Parlamento mester tuma responsabilidad tambe. Segun Pieters, SERLIMAR tin e obligacion legal pa recoge sushi y contribui na maneho di desperdicio, pero e realidad ta cu e compania ainda no tin ful e capacidad, ni personal, ni presupuesto pa carga tur e responsabilidadnan cu gobierno ta pone riba nan schouder.
Algo increibel pero berdad ta cu actualmente, SERLIMAR un compania di Aruba ainda mester paga un tipping fee na e compania priva, pa procesa sushi riba tereno di pais Aruba. Pa Pieters, esaki ta un muestra, cu Aruba ainda no tin un sistema structural y sostenibel pa maneho di desperdicio.
“Tin ley caba. E pregunta no ta si tin ley. E pregunta ta pakico nos no ta ehecuta nan,” el a declara.
“Cancer di Aruba ta door di falta di handhaving”
Den un di e momentonan mas fuerte di e entrevista, Pieters a declara cu “e cancer di Aruba ta door di falta di handhaving.” Segun Pieters, hopi biaha gobierno ta evita tuma accion firme, pasobra niun hende kier bay duro riba comportacion iresponsabel di nos hendenan.
“No por ta normal cu un Prome Minister mester bay piki sushi manera frigidaire den bario, pasobra hende no kier sigui regla. Esaki no ta yuda pa cambia a titud ni situacion di sushi na Aruba” Pieters a bisa. Pa PPA, e tempo a yega pa aplica multa y sanccion serio na esunnan cu conscientemente ta sushando Aruba.
E solucion real ta cambio di mentalidad
A pesar di su critica fuerte, Pieters a enfatisa cu e solucion riba largo plazo, no ta solamente represion, pero educacion. Segun Pieters, e cambio mester cuminsa for di scol y na cas.
“Mucha no por siña na scol pa cuida medio ambiente, mientras mayor ta habri porta di auto y tira boter pafor,” el a expresa.
Fraccion di PPA ta kere cu Aruba mester move na un cultura, unda separacion di sushi, reciclahe y responsabilidad civico ta bira algo normal, no excepcion.
“No tin sostenibilidad sin disciplina”
Pieters a conclui cu Aruba no por sigui papia di turismo sostenibel y calidad di bida, mientras e problema di sushi ta sigui ta for di control. Pa logra un Aruba limpi y sostenibel, gobierno mester stop cu discurso y show y finalmente cuminsa mustra liderazgo, aplica ley cu autoridad, consistencia y vision.
“Un pais limpi no ta djis crea cu slogan. Ta crea cu disciplina, educacion y liderazgo cu no tin miedo di tuma decision,” el a conclui.
