Parlamentario Shailiny Tromp-Lee (MEP): 

Diamarsa mainta, 13 di juni 2023, conhuntamente cu Minister President, sra. Evelyn Wever-Croes y Presidente di Parlamento sr. Edgard Vrolijk, mi a bishita Aurora Kleuterschool na Tanki Leendert. Un bishita en conexion cu EduTech Fund, cual ta un fondo pa innovacion na scolnan. E meta di e fondo ta pa stimula participacion entre studiante y maestronan y haci e klasnan mas interactivo. Duna studiante y maestronan e tools pa incorpora e mundo digital den nan klas. Sigur esaki lo aporta grandemente pa desaroya ‘digital literacy’ den scolnan rond Aruba. 

E fondo aki ta cay bou Futura. Pa e aña aki Futura a pone 400 mil florin den EduTech Fund. Cada kwartaal a pone 100 mil florin disponibel caminda via un proceso di iniciativa propio scolnan por inscribi nan proyecto di innovacion. Mediante un panel di hurado independiente ta scoge e ganadornan di cada kwartaal.

Ya caba tabatin 2 ronda caminda en total 6 scol a ricibi financiamento pa nan por realisa e proyecto cu nan a presenta. Esakinan ta: 

  1. Colegio Bon Bini cu a ricibi 4 eBoards pa 4 klas y 25 tablets pa nan smartroom;
  2. EPI cu a ricibi boardgames, licenses y eBooks cu lo wordo uza como un ‘Digital Exploration Model of the 21st Century Skills’ pa por midi den nan studiantenan con avansa nan ta den e 21st century skills y unda nan mester mas ayudo;
  3. Aurora Scol Preparatorio cu a ricibi 3 eBoards pa nan 3 klasnan;
  4. EduCampus cu lo ricibi un modular unit y diferente aparato, muebleria, y articulonan pa por establece un Makerspace pa nan studiantenan y studiantenan di scolnan den besindario;
  5. Pius X School cu lo ricibi 7 eBoards pa 7 di nan klasnan;
  6. Maria Goretti College cu a ricibi 2 eBoards pa nan 5de klasnan, 2 laptops pa e maestronan y 25 tablets.

En conexion cu e proyectonan cu ya a ricibi  financiamento, mi ta realisando hunto cu Minister President, bishita na algun scol. Sigur e bishita na Aurora Kleuterschool tabata imprecionante. Di cerca por a experencia e impacto di e inversion realisa den tres (3) eBoard pa nan klasnan. Sigur por a wak con e muchanan ta encanta e manera interactivo aki di haya les. Nan ta manera den nan elemento. Sigur e manera con nos por a wak e maestronan ta uza e eBoardsnan ta accentua nan importancia y impacto. 

Ta di elogia y aplaudi e scolnan cu ta entregando nan proyectonan y a base di iniciativa propio ta busca maneranan pa haci nan manera di duna les uno mas innovativo y interactivo. Aalbes mester gradici Gobierno di Aruba cu mediante Futura ta haci e proyectonan aki posibel. Un vision di nos Minister President cu a y ta sigui duna su frutanan. Masha pabien na un y tur cu ta participa y haci e proyectonan aki posibel.

Actualmente EduTech ta tumando aplicacion pa di 4 y ultimo ronda di financiamento. Ainda por entrega proyecto te cu dia 30 di juni 2023 riba nan website www.edutecharuba.org. Dus como scol ainda bo tin chens pa presenta boso proyecto. Haci bon uzo di e posibilidad aki cu ta keda brinda via e fondo aki.

LEAVE A REPLY

Please enter your comment!
Please enter your name here