E ehercisio militar anual Barracuda Warrior ta cuminsa atrobe. Di 26 di januari te cu 6 di februari diferente unidad militar for di region Caribe ta bini hunto na Corsou. E meta di e ehercisio ta pa fortifica e cooperacion entre e diverso unidadnan cu generalmente ta staciona riba diferente isla. Na tur, mas cu 180 militar ta participa na e ehercisio aki.
E actividadnan durante Barracuda Warrior ta tuma luga na tereno di ehercisio di defensa Wacao, Koraal Tabak, e hospital bieu na Otrobanda y den vecindario di Playa Kanoa. E entrenamentonan ta consisti di diferente parti manera operacion riba lama y tera, actuacion den area habita, ehercisio di tiro y simulacion di atakenan plania y no plania. E militarnan ta entrena tanto den dia como anochi.
Na ehercisio Barracuda Warrior ta participa mas cu 180 militar; nan ta procedente di Marine Squadron Carib for di Aruba, e Mariniersdetachement Sint Maarten, e Bootpeloton di Corsou, unidadnan di Landmacht y militarnan di Corsou. E militarnan di Corsou ta participa cada bes mas frecuentemente na ehercisionan militar grandi den cuadro di profesionalisacion di e militarnan den Caribe.
Barracuda Warrior ta keda un ehercisio militar anual importante pa aumenta e preparacion y conexion entre e unidadnan den region Caribe. Esaki ta contribui na brinda pas y seguridad den region Caribe.
