Awe mainta, Corte di Husticia a trata e caso penal cu Ministerio Publico a cuminsa contra e hoben homber S.H. (17), kende ta wordo acusa di a menaza hende cu arma.
SOLO DI PUEBLO por a compronde cu durante tratamento di e caso a sali na cla cu S.H. ta huma marihuana tur dia y cu e mama ta lag’e hacie. E mama a bisa Hues cu asina su yiu ta keda trankilo.
MENAZA CU ARMA
Den sala di Corte tabata presente e mayornan di S.H. Hues a puntra S.H. riba e caso na October 2022, caminda el a forza un homber pa dun’e su cellular. S.H. a admiti pero no ta corda con el a sosode.
Hues a bisa cu e raport di Polis ta mustra cu S.H. a bay riba un homber y a exigi pa e homber dun’e su cellular. S.H. a lanta su flanel y mustra e homber cu e tin un machete. E ora ey e homber a duna e cellular. Relaciona cu esaki, S.H. tambe ta wordo acusa di posecion di un machete riba caya.
E otro caso tabata dia 1 September 2023, caminda S.H. a menaza e dama K. cu un arma di candela. Ta asina cu Polis a detene S.H. y a hay’e cu e arma. A resulta cu ta un revolver di aire cu ta parce un arma di candela. S.H. tambe ta wordo acusa di posecion di un arma di candela.
Hues a bisa S.H. cu e revolver di aire ta wordo considera como arma di candela. Hues a puntra S.H. pakico e tabata cana cu e arma. S.H. a bisa Hues cu ta normal. Hues a remarca cu esey no ta un cellular cu bo ta cana cun’e. Hues a bisa cu S.H. a expresa “awor boso ta bay h…. Mi ta bay tira boso”. Hues a bisa cu e expresionnan ey ta considera como menaza. Segun S.H., un hende a menace cu un revolver 38 y pesey el a dicidi di busca un arma.
HUMA MARIHUANA TUR DIA
Durante tratamento di e caso a sali na cla cu S.H. ta usa marihuana tur dia. Hues a puntr’e si e ta un adicto. S.H. a bisa cu e no ta un adicto.
Hues a pidi e empleado di Reclasering cu tabata presente den sala di Corte, pa duna mas informacion riba evaluacion di Reclasering. E dama di Reclasering a splica Hues cu diferente hende a papia cu S.H. El a recomenda pa Hues scucha e mama, kende a participa den e programanan cu su yiu S.H. mester a sigui. E mama a bisa Hues cu e ta haya cu S.H. a cambia. E mama a bisa cu S.H. no ta anda mas den gang. El a splica Hues cu ora S.H. caba na school e ta bay cas y ta huma marihuana hunto cu e otro ruman homber. Hues a remarca cu psycologo ta preocupa cu e usamento di marihuana. E mama a bisa cu e marihuana ta calma S.H. E tata di S.H. a bisa cu S.H. a cambia y no ta cana den gang. E ta traha na un compania.
FISCAL
Fiscal a bisa cu e ta haya legalmente proba cu S.H. a menaza hende cu machete pa dun’e e cellular na 2022.
E di dos caso riba 1 September 2023, Fiscal a bisa cu e dama K. a haci denuncia ora el a mira S.H. cu e revolver. E dama a kere cu ta un arma di berdad S.H. tabatin siendo cu e ta un revolver di aire. Fiscal a bisa cu ley ta mustra cu revolver of pistol di aire, ta wordo considera un arma di berdad pasobra e ta suficiente pa causa spanto na otro persona.
Fiscal a hala atencion di S.H. cu e casonan aki tin castigo di prison pero Fiscal ta tene cuenta cu ta promer biaha S.H. a cay cera.
Fiscal a mustra cu a purba duna S.H. un chens door di tene Tomzitting pero S.H. no a cumpli cu tur e exigencianan. Ta pesey a dicidi di haci e caso penal.
Fiscal a bisa cu e ta contento di scucha cu S.H. ta bay bon na school y tin un trabao. Fiscal ta preocupa cu S.H. ta sigui usa marihuana. El a hala atencion di S.H. cu si e sigui usa droga, a lo largo e no lo haya un trabao fiho pasobra ora haci test di droga na trabao, esaki lo tin consecuencia p’e. Fiscal a bisa cu e ta exigi un castigo combina pa asina pone presion riba S.H. Fiscal a exigi 360 dia di prison di cual 287 dia ta condicional cu 2 aña di prueba y bou guia di Reclasering. Tambe Fiscal a exigi un multa di 250 florin of 5 dia sera pasobra S.H. a cana cu un machete.
ABOGADO
Mr. D.Croes a bisa Hues cu S.H. ta un hoben hopi sera y no ta papia. E abogado a bisa cu e famia ta bay di acuerdo cu e exigencia di Fiscal.
SENTENCIA
Hues a sera tratamento di e caso y a dicta sentencia di biaha. Hues ta haya legalmente proba tur e acusacionnan y cu ta trata di casonan serio. Hues ta haya cu S.H. ta bayendo den bon direccion. El a confirma exigencia di Fiscal pero e multa, Hues a bisa cu esey ta bira condicional. Hues a condena S.H. na 360 dia di prison di cual 287 dia ta condicional cu 2 aña di prueba y bou guia di Reclasering. Hues a haci e multa di 250 florin, condicional cu un tempo di prueba di 2 aña. Cu e sentencia aki, S.H. no mester bolbe bay sera.
