ORANJESTAD – Mayan mainta Corte di Husticia ta trata e caso penal cu Ministerio Publico a cuminsa contra e sospechoso Rudy “Elvis” Weert.
Na Augustus 2021, Solo di Pueblo a informa momento cu Weert su caso a wordo trata pro forma via video conference. E tempo ey a keda palabra cu mayan ta dia di tratamento di e caso. Fiscal a haci un serie di acusacionnan contra Weert.
VIOLA MUCHA
E promer acusacion ta cu entre 19 Maart 2005 te cu 1 Maart 2009, Weert door di usa menaza y violencia, a viola e mucha G. E tempo ey G., tabatin 14 aña y tabata bou cuido di Weert. Fiscal a menciona cu Weert ta wordo sospecha di a mishi na e mucha su pechonan, su parti intimo y a tene relacion sexual cu e mucha. Esaki lo tabata sosode den un apartamento scondi.
ACTONAN INMORAL
Fiscal a sigui bisa cu e otro acusacion contra Weert ta cu entre 19 Maart 2005 te cu 18 Maart 2007, el a haci actonan inmoral cu e mucha G. cu tabata bou di su cuido. E mucha e tempo ey no tabatin 16 aña ainda. Fiscal a bisa cu Weert lo a mishi na partinan intimo di e mucha y a hasta tene relacion sexual cun’e.
Fiscal a bisa cu e mesun cos lo a sosode tambe entre 19 Maart 2007 te cu 1 Maart 2009.
MALTRATO SEVERO CU A CAUSA MISKRAAM
Fiscal tambe ta acusa Weert cu entre 19 Maart 2006 y 19 Maart 2009, intencional y premedita, a maltrata e hoben G.(18) cu consecuencia cu el a sufri un miskraam. Fiscal ta mustra cu Weert lo a hinca un hangua of algo skerpi na e parti intimo di G. cu consecuencia cu el a sufri un miskraam.
Solo di Pueblo lo informa kico Fiscal ta pensa di e caso serio aki.
