Faltando apenas 34 dia pa e inicio di e Mundial 2026, Estadio Azteca ta prepara pa skirbi capitulonan nobo den su historia rico. E Coloso di Santa Ursula, cu ta cumpli 60 aña dia 29 di mei proximo, ta keda e unico luga den historia cu lo a fungi como sede den tres diferente torneo mundialista.
E biaha aki, e stadion cu a mira Pele lanta e Copa Jules Rimet na 1970 y Diego Maradona corona su mes na 1986, no lo ta e escenario di e gran final. Sinembargo, e lo tin e honor di ta anfitrion di e apertura oficial dia 11 di juni, banda di tres partido di prome buelta, un di e diesseis y un di octavo final.
Un herencia di innovacion den futbol
El Azteca no ta simplemente un structura di beton; e ta e luga caminda e reglanan moderno di futbol a haya bida. Den e Mundial di 1970, pa prome biaha a introduci e uzo di carchi geel y cora, inspira p’e holoshi di trafico (semaforo) pa duna advertencia universal na e hungadonan. E prome carchi geel den historia a wordo duna netamente den e stadion aki na e hungador Kakhi Asatiani durante e partido inaugural entre Mexico y Union Sovietica.
Mesun cos a pasa cu e cambionan di hungado. Mexico 1970 a marca e debut di e sistema di substitucion, y El Azteca tabata testigo di e prome biaha cu un hungado a drenta pa reemplasa un otro den un competencia mundial.
Mas cu deporte: Un icono cultural
E stadion aki a inspira artista manera Andres Calamaro, kende den su cancion “Estadio Azteca” ta describi e sensacion di keda impresiona pa e “gigante” aki. Su historia ta abarca hopi mas cu gol:
- Religion y Musica: Na 1999, Papa Juan Pablo II a reuni mas di 100.000 fiel, mientras cu na 1993, Michael Jackson a atrae mey miyon di persona durante su gira “Dangerous World Tour”.
- Boxeo: E record di asistencia pa boxeo ta pertenece na e luga aki, caminda 132.000 fanatico a mira Julio Cesar Chavez derota Greg Haugen.
- Partidonan historico: E “Partido di Siglo” entre Italia y Alemania Federal na 1970 tambe a tuma luga riba e yerba aki, caminda Franz Beckenbauer a hunga cu su schouder disloca.
Renobacion pa e gran cita
Construi riba piedra volcanico y hasta cu un fossiel di mamoet descubri durante su construccion, El Azteca a pasa door di un proceso di renobacion acelera pa ta cla pa e Mundial 2026. Awo, cu un capacidad di 87.500 espectador, e stadion ta prepara pa su di tres inauguracion mundialista, wardando riba e momentonan cu pronto lo bira leyenda den e buki di historia di e deporte rey.
