Stingray Swimming Team ta sigui celebra un desempeño excepcional di su atleta elite, Elisabeth Timmer, kende durante e Rotterdam Qualification Meet 2026 a confirma su crecemento continuo riba escenario internacional cu e recordnan nacional, multipel mehoracion di tempo (personal best) y un mentalidad fuerte cu ta sigui pusha su mes pa mas.
Record Arubano Kibra dos biaha
Elisabeth a logra algo extraordinario den evento di 100m freestyle: dos biaha kibra Record Arubano den un solo dia. Mainta el a kibra e record pa prome biaha, marcando un tempo di 56.68 y atardi el a bolbe baha su tempo, cu pa un impresionante tempo di 56.45.
E resultado aki no solamente ta un logro tecnico, pero un prueba di consistencia y capacidad pa presta bou di presion.
3 Personal Best: Señal di Progreso Real
Durante e competencia aki, Elisabeth a registra:
- 100m Freestyle – 2x PB (y record Arubano)
- 50m Freestyle – 1x PB
Tres mehoracion di tempo (PB) den un competencia internacional ta confirma cu su training ta dunando resultado y cu e ta avanzando den e direccion corecto.
50m Backstroke: Cerca di Un Siguiente Record Nacional
Den e 50m lomba, Elisabeth a termina e final cu un tempo di 30.26, yegando cada biaha mas cerca na e meta di baha bou di 30 seconde.
Segun su propio palabranan:
“Mi no a logra kibra e record ainda, pero mi a keda hopi cerca…y e 29 seconde lo bini pronto, paso mi ta sigui train duro.”
E determinacion aki ta refleha claramente e mentalidad di un atleta cu no ta conforma, pero cu ta sigui traha pa excelencia.
Mentalidad di Campeon
Mas cu e temponan, loke ta destaca ta su actitud:
- Refleha riba su carera
- Reconoce unda por mehora
- Y sigui cu enfoke pa e siguiente oportunidad
Esey ta e base di berdadero crecemento den deporte di nivel halto.
Orguyo pa Aruba
Compitiendo contra e atletanan di nivel Europeo, Elisabeth Timmer ta pone Aruba riba mapa cu cada salida, cada stroke y cada finish. Su logro ta un inspiracion pa e landadonan hoben y un ehempel cla di con leu dedicacion y disciplina por yega.
Stingray Ta Celebra
Stingray Swimming Team ta felicita Elisabeth pa su desempeño extraordinario di bolbe tin Record Arubano, hunto cu multipel mehoracion di tempo (PB’s) y un progreso constante.
