Prome Minister di Aruba mr. Mike Eman a tene reunion cu Su Excelencia Julius Liljestrem, Embahador nobo di Suecia pa Reino Hulandes, como parti di su bishita di introduccion na Aruba.
E reunion aki ta un oportunidad pa reafirma e laso exsistente entre Aruba y Suecia den cuadro di Reino, como tambe e posibilidad pa explora interes comun, manera desaroyo economico sostenibel, innovacion y digitalisacion, transicion pa energia duradero y resistencia climatico.
Liderato di Suecia den energia renobabel, tecnologia berde, economia circular y gobernacion digital ta algun di e ambicionnan di Aruba, pa logra un transicion energetico sostenibel, diversificacion economico, servicio publico modernisa, turismo sostenibel y desaroyo pa negoshinan chikito y mediano.
Durante e dialogo tambe dialoga riba e prioridadnan comun manera resilencia climatico, cooperacion maritimo y intercambio people to people, pa fortalece e base pa futuro cooperacion.
Durante su estadia, Embahador Liljestrem a tene diferente reunion di introducion, manera entre otro cu Gobernador di Aruba, Presidente di Parlamento, como tambe cu Prome Minister Excelencia Mike Eman.
Durante di e reunionnan, a trata diferente tema di interes mutuo manera e exploracion di relacion y cooperacion den Reino, cooperacion gubernamental y diplomatico y e interes potencial di Suecia den cooperacion den paisnan Caribense di Reino Hulandes.
