/// Abuso ta sigui…
*** Enbes cu Crisisteam trata hende cu dignidad, nan kier sigui trata hende pio cu cacho
/// Crisis-team ta chupa regla for di duim y kier sigui abusa cu reglanan di entiero
Den un comunicado emiti ayera (maart 3) pa Crisisteam, enbes cu e team aki dirigi pa Rino Hermans recapacita di nan fout, nan kier sigui ta “wrong and strong”. Nan ta robes, y no kier baha cabes!
Den un maneho anuncia den e comunicado ( pa prome ves anuncia na pueblo), nan ta informa cu tur entiero di pacient di covid mester bay cera, caha cera y sin cu famia por wak y despedi di nan ser keri.
E regla aki ta carece di tur hustificacion y nan ta cometiendo un violacion di derechonan humano, nan desicion ta carece di cualke estudio cientifico, medico, pa backup nan ponencia. Crisisteam ta mas experto cu WHO, RIVM, y DVG di Aruba???
/ CHUPA FOR DI DUIM:
E motibo cu nan a duna, cu tin diferente variante di covid-19, y pesey nan ta prohibi un entiero normal, ta absurdo. Ningun organisacion di salud ta menciona esaki. Rino Hermans ta mas sabi cu WHO?
/ KICO TE AFAN PA STROBA FAMIA?
Pasobra no ta nan mama of nan tata a fayece? Pasobra nan no sa con dolor y cuanto daño mental nan ta ocaciona na famianan dor di nenganan di wak nan ser keri? Of Rino Hermans kier defende e abuso di Aurora, cu ta esun cu a dicidi e maneho unilateral aki, contra tur regla internacional ?
/ PISTOL NA CABES:
Den nan comunicado nan ta informa cu funerarianan tin un acuerdo y cu recientemente a reuni cu nan. Un bes mas nan no a trece e berdad dilanti, pasobra loke a sosode den e reunion ey, ta un falti respect, un absuso di poder, un intimidacion teribel, unda hasta miembro di Crisisteam a coba mama di hende durante e reunion. Un Rino Hermans burachi di poder, ta dal man riba mesa, lansa grito, pa asina purba na intimida funerarianan. Y dicon? Pe sigui defende e crueldad di Aurora? Pasobra nan kier trata hende pio cu cacho ???
/ DAÑO TA INMENSO:
E daño physcologico cu Rino Hermans ta hasiendo, hunto cu demas miembronan di crisis team no tin nomber! Bo no por chupa regla di duim y tur hende ta para wak y laga e loco dalbay cu su reglanan sin ningun base.
SOLO DI PUEBLO ta para pa e berdad y ta para pa e abuso aki wordo corigi. Tur famia por haya un entiero normal di nan ser keri segun tur protocol. Ta ken Crisisteam a kere nan ta pa desvia di protocol international?
E mensahe mester bay bon cla pa nan: mientras nan no recapasita di nan maldad, nan error, nan estupides, nan por spera cu nos lo keda busca tur posibilidad legal pa pone un paro nan abuso contral pueblo. Hende ta central y merece un trato digno! Aworaki Crisisteam kier trata hende pior cu cacho y ta un lamento hopi grandi y berguenza pa e team aki.
