Durante un encuentro cu dos diplomatico na Bestuurskantoor, Prome Minister Mike Eman y Minister di Turismo mr. Wendrick Cicilia a reuni cu Birgitta Tazelaar cu ta fungi como embahador di Reino Hulandes na Washington D.C., Merca y Chargé d’affaires di Embahada di Reino Hulandes na Caracas, Venezuela Carmen Gonsalves, pa dialoga riba desaroyo economico, cooperacion regional y e posicion strategico di Aruba den un contexto geopolitico cu ta evoluciona rapidamente.
E encuentro a tuma luga den un momento historico pa Aruba, mirando cu e isla ta conmemora 40 aña di Status Aparte y 50 aña di Himno y Bandera, loke tambe a forma un oportunidad pa reflexiona riba identidad, unidad y futuro di e pais.
Segun Prome Minister Mike Eman, e reunion a representa un paso importante pa Aruba fortalece su relacionnan internacional y explora nobo oportunidadnan economico. El a enfatisa cu Aruba mester sigui diversifica su economia y posiciona su mes strategicamente den region.
“Nos ta na un momento unda Aruba mester mira mas aya di turismo y desaroya otro pilar economico. Nos kier posiciona Aruba como un centro di servicio, conocimiento y cooperacion den region,” Eman a expresa.
Durante e encuentro, e diplomaticonan a subraya e importancia di cooperacion estrecho entre Reino Hulandes, Merca y e region Caribe. Tambe a wordo destaca cu e interes di Merca den e region ta aumentando, loke por habri porta pa colaboracion y inversion nobo.
Un di e areanan cu a bin na discusion ta con Aruba por fortalece su rol como hub estrategico entre Latino America y Merca, incluyendo posibilidadnan den conectividad, infrastructura digital y intercambio economico.
E diplomaticonan a indica cu e situacion actual den region ta presenta oportunidadnan positivo pa desaroyo economico, y cu nan lo continua monitorea e cambionan pa identifica posibilidadnan pa cooperacion cu Aruba y otro paisnan.
Tambe a destaca e importancia di dialogo intelectual y intercambio di conocimiento, unda Aruba por desempeña un rol como plataforma pa discusion riba tema global y desaroyo di sociedadnan moderno.
Durante nan estadia na Aruba, e diplomaticonan a expresa nan aprecio pa e celebracionnan nacional y e fuerte sentido di identidad y union entre e pueblo Arubiano. Nan a resalta con e celebracion di Himno y Bandera y Status Aparte a mustra claramente e orguyo nacional y cohesion social di e isla.
Gobierno di Aruba ta considera e encuentro aki como un paso positivo den su esfuerzo pa amplia e base economico di e pais y pa posiciona Aruba como un socio confiabel y dinamico den region.
